Центральное духовное управление мусульман - Таврический муфтият - Ошек (гъыйбет)

Ошек (гъыйбет)

إِنَّ الْحَمْدَ لِلَّهِ نَحْمَدهُ وَنَسْتَغْفِرُهُ وَنَسْتَعِينُهُ وَنَسْتَهْدِيهِ وَنَعُوذُ بِاللهِ مِن شُرُورِ أَنفُسِنَا وَمِن سَيِّئَاتِ أَعْمَالِنَا، مَن يَهْدِ اللهُ فَلاَ مُضِلَّ لَهُ وَمَن يُضْلِلْ فَلاَ هَادِيَ لَهُ، وَأَشْهَدُ أَن لاَ إِلهَ إِلاَّ اللهُ وَحْدَهُ لاَ شَرِيكَ لَهُ، وَأَشْهَدُ أَنَّ سَيِّدَنَا مُحَمَّدًا عَبْدُهُ وَرَسُولُهُ صَلَوَاتُ اللهِ وَسَلاَمُهُ عَلَيْهِ وَعَلَى كُلِّ رَسُولٍ أَرْسَلَه.

أَمَّا بَعدُ عِبَادَ اللهِ، أُوصِيكُمْ وَنَفْسِيَ بِتَقْوَى اللهِ الْعَلِيِّ الْعَظِيمِ

قال الله تعالى في القرآن الكريم ﴿قُل هُوَ الله أَحَد﴾

Юдже Аллаhкъа хамд олсун! Онъа тенъ ве ошагъан ич бир шей ве ич кимсе ёкъ. О къусурсыз, сынъырсыз, акъылнен тасавур этильмеген, тараф ве мекян яратылмаздан эвель бар эди.   Аллаhкъа ич бир шей ошамай, О эр шейни эшите ве коре.

Ресуллерден ве Пейгъамберлерден энъ улу, энъ шерефли олгъан Мухаммад Пейгъамберимизге, онданъ эввель олгъан бутюн Пейгъамберлерге, Пейгъамберимизнинъ несилине ве сахабелерине салят ве селямлар олсун.

Екяне Яратыджыгъа такъвалы ве итаатлы олмагъа эр кесни давет этем. Сайгъылы джемаат эр вакъыт Шари‘атны кутьмек ве Ахирет кунюне азырланмакъ керекмиз. Чункю  О кунь акъикъий итикъады олмагъан инсанларгъа бу дюньяда саип олгъанлары : мал, пара ве я балалары артыкъ ярдым этип оламазлар.

Сайгъылы мусульманлар!

Аллаhу Та'аля Къур'ан-и Керимде, «Аль-Худжурат» Суресининъ 12-нджи аетинде шойле буюрды:

يَا أَيُّهَا الَّذِينَ آمَنُوا اجْتَنِبُوا كَثِيرًا مِنَ الظَّنِّ إِنَّ بَعْضَ الظَّنِّ إِثْمٌ ۖ وَلَا تَجَسَّسُوا وَلَا يَغْتَبْ بَعْضُكُمْ بَعْضًا ۚ أَيُحِبُّ أَحَدُكُمْ أَنْ يَأْكُلَ لَحْمَ أَخِيهِ مَيْتًا فَكَرِهْتُمُوهُ ۚ وَاتَّقُوا اللَّهَ ۚ إِنَّ اللَّهَ تَوَّابٌ رَحِيمٌ

Манасы: «Бири-биринъиз акъкъында ошек япманъыз. Ольген мусульман къардашынынъ этини ашамакътан кейфленирсинъизми? Ёкъ, ондан игренирсинъиз. Ойле исе Аллаhтан къоркъунъыз, шубхесиз Аллаh чокъ багъышлайыджыдыр».

Сайгъылы мусульманлар! Билинъиз ки, мусульман акъында гъыйбет, яда ошек япмакъ – ольген инсаннынъ этини ашамакъ дайындыр. Эр биримиз тилимизни Аллаhнынъ харам эткен шейлерден къорчаламкъ керекмиз. Амма маалесеф джемиетимизде, топлумумызда ярамай бир адет ве ольдюриджи хасталыкъ бардыр ки, инсанны ёкъ этер, акърабаларны бири-биринден айырыр, севген инсанларны бири-биринден узакълаштырыр, къавгъаларгъа себеп олур. Бу хасталыкъ – ошектир. Айтып кечкен аетте ошекнинъ ачыкъ бир шекильде харам олгъаны бильдириле. Яни Аллаhу Та'аля бу аетте бизлерни ошек япмакътан тенбиеледи ве ошек этмекни олюнинъ этини ашамасына ошатты. Бу да, ошек не къадар чиркин олгъаныны косьтере.

Сайгъылы мусульманлар! Такъвалы инсан тилини ве элини харам ичюн къулланмаз. Пейгъамбер Эфендимиз Исра геджесинде, бетлерини ве кокреклерини бакъыр тырнакъларынен тырнагъан бир топлум инсанларны корьди ве Джебраильден сорады: «Булар ким?» Джебраиль деди: «Бу – ошек япкъан инсанлардыр». Пейгъамбер Эфендимиз гъыйбетни шойле ачыкълады: «Гъыйбет – бу мусульман къардашынынъ аркъасындан о бегенмейджек шейлерни айтмакътыр». Сахабелер айттылар: «Я Ресулюллаh, я айтылгъан шей керчек олса? Пейгъамбер Эфендимиз деди ки: «Керчек олса – гыйбеттир, керчек олмаса – ифтира», яни даа буюк гунаhтыр.

Сайгъылы мусульманлар! Гъыйбет насыл олур? Мисаль, бир инсан башкъа мусульман акъкъында айтса: «О узун бойлу, я да къыскъа бойлу, я да апайы оны ашалата, я да балалары тербиесиз, я да эви кирли, я да озю кирли, я да онынъ бети чиркин, я да онынъ ольген бабасы кимсени урьмет этмез эди» киби лафлар – гъыйбет, ошектир.

Сайгъылы мусульманлар! Гъыйбет япмакъ харам олгъаны киби, оны динълемек те – харамдыр. Озюни харам шейлерни динълемектен къорчалагъан мусульманларны Аллаhу Та'аля Къур'ан-и Керимде шойле макътагъан:

Манасы: «Олар бош сёз эшиткенде бетини чевирип, оны динълезмелер».

Пейгъамбер Эфендимиз шойле буюрды:

رواه مسلممَنْ رَأَى مِنْكُمْ مُنْكَرًا فَلْيُغَيِّرْهُ بِيَدِهِ فَإِنْ لَمْ يَسْتَطِعْ فَبِلِسَانِهِ فَإِنْ لَمْ يَسْتَطِعْ فَبِقَلْبِهِ وَذَلِكَ أَضْعَفُ الْإِيمَان 

Манасы: «Сизден ким яманлыкъны корьсе (япылгъаныны огренсе), оны эльнен догъурласын, эльнен догъурламагъа кучю етмесе, тилинен догъурласын, тилинен догъурлап оламаса, юрегинен инкяр этсин. Бу елинен ве тильнен догъурлап олмагъананда инсаннынъ япаджагъы энъ сонъ вазифедир». Ким бир топлашувда олып, ошек эшитсе, кучю етсе, ошекни токътатмакъ керек. Кучю етмесе, юрегинде оны къабул этмейип, топлашувдан кетмек керек.

Сайгъылы мусульманлар! Динимиз бизни яхшылыкъны эмир этмемизни ве яманлыкътан сакъындырмамызны чагъыра, догъру олгъангъа – догъру, янълыш олгъангъа – янълыштыр айтмамызны эмир эте. Бильгенинъиз киби, Ахыр заманда яшаймыз. Пейгъамбер Эфендимиз, илимсиз фетва бергенлернинъ чокълашаджагъыны бильдирген эди. Бунынъ ичюн, бизим бойнумызгъа тюшкен иш – янълыш фетва берген ве янълыш диний бильгилерни даркъаткъан инсанлардан сакъындырмакътыр. Бу – бизим ичюн фарздыр, эбет сайгъылы джемаат бу да бир гъыйбет чешиди сайыла, амма бу гъыйбет ичюн мусульман гунахкъа кирмей. Пейгъамберимиз немли олгъан богъдайын къусурыны гизлеп сатмагъа чалышкъан туджджаргъа шойле деген:

مَنْ غَشَّنَا فَلَيْسَ مِنَّا

Манасы: "Бизни алдаткъан – бизден дегильдир», яни такъвалы мусульман оларакъ сайылмай".

Сайгъылы мусульманлар! Иште, Пейгъамбер Эфендимиз бу алдаткъан инсангъа къаршы сусмайып, хакъсызлыкътан сакъындыргъан олса, биз де диний меселе олсун, я да дюнья меселеси олсун, хакъсызлыкъкъа сусмамакъ керекмиз. Эй, мусульман къардашларым! Аллаhнынъ харам эткен шейлерден тилимизни къорчаламагъа тырышайыкъ ве ошектен къачынайыкъ. Эр вакъыт Пейгъамберимизнинъ шу Хадисини акълымызда тутайыкъ:

أَكْثَرُ خَطَايَا ابْنِ ءَادَمَ مِنْ لِسَانِهِ

Манасы : «Адем огълунынъ гунаhларынынъ чокъусы – тилиндендир».

Аллаhу Та'аля эпимизни ошектен ве башкъа гунаhлардан къорчаласын!

هَذَا وَأَسْتَغْفِرُ اللَّهَ لِي وَلَكُمْ

______________________________________________________________

الْحَمْدُ للهِ رَبِّ الْعَالَمِينَ وَالصَّلاَةُ وَالسَّلاَمُ عَلَى نَبِيِّهِ الْكَرِيمِ وَعَلَى ءَالِهِ وَأَصْحَابِهِ الطَّيِّبِينَ الطَّاهِرِينَ، عِبَادَ اللهِ أُوصِيكُمْ وَنَفْسِيَ بِتَقْوَى اللهِ الْعَظِيمِ

قال الله تعالى ﴿ إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا﴾

اللَّهُمَّ صَلِّ عَلَى سَيِّدِنَا مُحَمَّدٍ وَعَلَى آلِ سَيِّدِنَا مُحَمَّدٍ كَمَا صَلَّيْتَ عَلَى سَيِّدِنَا إِبْرَاهِيمَ وَعَلَى آلِ سَيِّدِنَا إِبْرَاهيمَ وَبَارِكْ على سيّدِنا مُحمدٍ وَعلى آلِ سيِّدِنا مُحمدٍ كما بارَكْتَ على سيِّدِنا إبراهيمَ وعلى آلِ سيدِنا إبراهيمَ في العالَمِينَ إِنَّكَ حَمِيدٌ مَجِيد

اللَّهُمَّ اغْفِرْ لِلْمُؤْمِنِينَ وَالْمُؤْمِنَاتِ الأَحْيَاءِ مِنْهُمْ وَالأَمْوَات