Центральное духовное управление мусульман - Таврический муфтият - Пейгъамбер ‘Исанынъ муджизелери

Пейгъамбер ‘Исанынъ муджизелери

إِنَّ الْحَمْدَ لِلَّهِ نَحْمَدهُ وَنَسْتَغْفِرُهُ وَنَسْتَعِينُهُ وَنَسْتَهْدِيهِ وَنَعُوذُ بِاللهِ مِن شُرُورِ أَنفُسِنَا وَمِن سَيِّئَاتِ أَعْمَالِنَا، مَن يَهْدِ اللهُ فَلاَ مُضِلَّ لَهُ وَمَن يُضْلِلْ فَلاَ هَادِيَ لَهُ، وَأَشْهَدُ أَن لاَ إِلهَ إِلاَّ اللهُ وَحْدَهُ لاَ شَرِيكَ لَهُ ولا مَثِيلَ له ولا ضِدَّ له ولا نِدَّ له، وَأَشْهَدُ أَنَّ سَيِّدَنَا وحَبِيبَنا وعظيمَنا وقائدَنا وقُرَّةَ أَعْيُنِنا مُحَمَّدًا عَبْدُهُ وَرَسُولُهُ وصَفِيُّهُ وحبيبُهُ صَلَوَاتُ اللهِ وَسَلاَمُهُ عَلَيْهِ وَعَلَى كُلِّ رَسُولٍ أَرْسَلَه. الصلاةُ والسلامُ عليكَ سيِّدي يا رسولَ الله. الصلاةُ والسلامُ عليكَ يا سيِّدي يا صاحِبَ الذِّكرَى يا أبا القاسِم يا أبا الزَّهْراءِ يا محمد. 
أَمَّا بَعدُ عِبَادَ اللهِ، فإني أُوصِيكُمْ وَنَفْسِيَ بِتَقْوَى اللهِ الْعَلِيِّ الْقَديرِ القائلِ في مُحْكَمِ كتابِه: 
﴿ يَاأَيُّهَا الَّذِينَ آمَنُوا اتَّقُوا اللَّهَ وَلْتَنْظُرْ نَفْسٌ مَا قَدَّمَتْ لِغَدٍ وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ﴾ 

Аллаhкъа хамд олсун, О бизге ярдым ве бизни афу этсин деп, Ду’а япамыз. Бизни шерден ве яманлыкътан къорчаласын деп, Онъа ялварамыз. Кимге Аллаh Акъикъий ёлуны берди, ич кимсе оны бу ёлдан айырмаз. Амма кимге Аллаh Акъикъий ёлуны бермеди, ич кимсе оны къорчаламаз. Шеhадет этем, Аллаhтан башкъа Иляh ёкъ, Онынъ ортагъы ёкъ ве Мухаммад Аллаhнынъ къулу ве Пейгъамберидир. Бизим Пейгъамберимизге ве башкъа бутюн Пейгъамберлерге солят ве селям олсун.

Аллаhнынъ къуллары! Такъвалы олмагъа эпинъизни давет этем. Аллаhнынъ буюргъаныны япынъыз ве гуняхлардан къачынынъыз.

Къур’анда («Аль-Бакъара» Суре, 136 Ает) буюрыла:

﴿قُولُوا ءامَنَّا بِاللَّهِ وَمَا أُنْزِلَ إِلَيْنَا وَمَا أُنْزِلَ إِلَى إِبْرَاهِيمَ وَإِسْمَاعِيلَ وَإِسْحَاقَ وَيَعْقُوبَ وَالْأَسْبَاطِ وَمَا أُوتِيَ مُوسَى وَعِيسَى وَمَا أُوتِيَ النَّبِيُّونَ مِنْ رَبِّهِمْ لَا نُفَرِّقُ بَيْنَ أَحَدٍ مِنْهُمْ وَنَحْنُ لَهُ مُسْلِمُونَ﴾

Манасы: «Биз Аллаhкъа, онынъ эндиргенине (Къур’ангъа) ве Ибраhимге, Исмаильге, Исхаккъа, Йа‘къубгъа ве онынъ огъулларына, Мусагъа ве ‘Исагъа эндирильгенине инандыкъ. Эм де Аллаhтан бутюн Пейгъамберлерге багъышлангъан ве бозулмагъан шейге инандыкъ. Биз Пейгъамберлерни бири-биринден айырмаймыз (иман шартларында) ве Екяне олгъан Аллаhкъа бойсунамыз».

Сайгъылы мусульманлар! Керчектен, Аллаh Пейгъамбер ве Ресуллерни озь къулларыны хидаетке ве итааткъа давет этмек ичюн ёллагъан. Олар Аллаhкъа ибадет этмеге давет эттилер ве гунях япкъанларны эм де Аллаhнынъ эмирлерини ерине кетирмегенлерни джезаландырыладжакъларыны тенбиледилер. Керчектен де, Пейгъамберлернинъ ве Ресуллернинъ омюрлерини бильмеге истегенлерге эм де олардан ибрет алгъаларгъа хайыр олур. Бильгенимиз киби, биринджи Пейгъамбер, бизим эфендимиз Адем ‘аляйhиссалям, сонъки Пейгъамбер исе Мухаммад ‘аляйhиссалям. Бутюн Пейгъамберлер инсанларгъа яхшылыкъны ве адалетни огреттилер. Догърулыкъкъа, сабыргъа, эдепке ве намуслы олмагъа давет эттилер. Олар эр кесни акъикъий ёлдан кетмеге ве фарзларны япмагъа эмир эткенлер.

Энъ улу Ресуллер (оларгъа «Улюль-‘азм» денир) –  бу Мухаммад, Ибраhим, Муса, ‘Иса ве Нух, ‘алейhиссалям. Бугунь биз ‘Иса ‘алейhиссалям акъкъында анълатаджакъмыз. ‘Иса ‘алейhиссалям ер юзюнде яшагъан Я‘къуб огъулларынынъ союндан кельген сонъки Пейгъамбер эди.

Сайгъылы джемаат! Пейгъамбер ‘Иса ‘алейhиссалям озь акъкъында Аллаhнынъ огълу я да Аллаh онынъ бабасы олгъаныны ич бир вакъыт айтмады. ‘Иса Пейгъамбер ‘алейhиссалям даа бешиктеки бала олгъанда биринджи сёзлери бойле эди («Марьям» Суреси, 30 Ает):

﴿إِنِّي عَبْدُ اللَّهِ﴾

Манасы: «Керчектен, мен Аллаhнынъ къулым!»

Бойлеликнен, ‘Иса ‘алейhиссалям Екяне, Къудретли ве эр шейнинъ Яратыджысы Аллаh олгъаныны айта ве къабул эте. О имансызлыкътан ве путпересликтен озь халкъыны тенбиледи. ‘Иса Пейгъамберге инангъан ве онъа табий олгъанлар – мусульманлардыр. Онынъ энъ якъын талебелери ве ярдымджылары хауарийюн деп адландырылдылар. Хауарилер инсанларны акъикъаткъа чагъырдылар ве яхшылыкъкъа огретип, ‘Исанынъ Шари‘атыны кутьмеге давет эттилер.

Аллаh Пейгъамберлерге даветлерине ярдым оларакъ муджизелер багъышлады. Бу муджизелер Пейгъамбернинъ керчек олгъаныны айткъанлары исе Аллаhнынъ бир вахий олгъаныны  тасдикълагъанлар.

Биз мусульман оларакъ ич бир Пейгъамберни ред этмейип, бутюн Пейгъамберлерни севемиз ве эписине инанамыз. Адем Пейгъамберден башлап, Мухаммад Пейгъамбергедже 124 бинъ Пейгъамбер келип кечти. Мухаммад Пейгъамберимизнинъ огюнде ‘Иса Пейгъамбер бар эди.

‘Иса Пейгъамбер 30 яшына кельгенде, инсанларны Екяне Яратыджыгъа инанмагъа ве тек  Онъа ибадет этмеге, Аллаhтан вахий кельди. Ондан сонъ о ер юзюнде юрип, шеэрлерге ве койлерге кирип, инсанларны Ислям динине давет этип, оларгъа бойле айткъан эди:

Манасы: «Екяне ве ортагъы олмагъан Аллаhкъа итаатлы олунъыз ве мен сизге Аллаhнынъ Эльчиси оларакъ ёллангъаныма инанынъыз».

‘Иса Пейгъамбернинъ биринджи муджизеси бойле эди: ‘Иса Пейгъамбернинъ анасы оны чешит ишлерге ёллай эди. Ве бир кере о урба боялагъан артельге чалышкъанда, бу артельнинъ устасы бир ерге кетмеге истеди ве ‘Исагъа бойле деди: «Мен санъа урбаны насыл бояламагъа керек олгъаныны огреттим. Ве энди сен озюнъ бу урбаларны боялап олурсынъ. Урбаны насыл ренкке бояламагъа керек олгъаныны бильмек  ичюн, устьлерине белли ренкте йип къойдым».

Ондан сонъ ‘Иса балабан къазанны атешке къойып, онынъ ичине тюрлю ренкли олгъан бояны тёкти, сонъра ичине бутюн урбаларыны къойып, бойле деди: «Аллаhнынъ Ирадесинен меним истегеним киби ол.» Уста кельгенде буны корьди ве ачувланып, ‘Исагъа бойле айтты: «Сен эписи урбаларны боздынъ.» ‘Иса Пейгъамбер исе къазандан урбаларны чыкъармагъа башлады, бириси къырмызы, экинджиси – сары, учюнджиси – ешиль ве бойле этип, устагъа насыл ренкте керек олгъаныны, ойле япты. Уста буны корип шашты. Ве бу Аллаhнынъ Ирадесинен олгъаныны бильген сонъ, ‘Иса Пейгъамберге инанды. Бундан сонъра озю Пейгъамбернинъ ярдымджысы олып, акъикъий динге давет этмеге башлады.

Бундан сонъ бир-бири артындан башкъа муджизелер де пейда олды. Бир кере ‘Иса Пейгъамбер озен ялысында юрьгенде балыкъчыларны корьди, оларнынъ башлыгъынынъ ады «Шам‘ун» эди. ‘Иса олардан сорады: «Сиз не япасынъыз?», олар дедилер: «Балыкъ тутамыз.» ‘Иса исе ''инсанларны тутмагъа истемейсинъизми'' - деди (яни инсанларны акъикъий ёлгъа къоймагъа). Сонъ олар дедилер: «Сен кимсинъ?» ‘Иса айтты: «Мен Мерьемнинъ огълу ‘Иса, Аллаhнынъ къулу ве Эльчисим.» Олар исе ‘Исадан озюнинъ керчеклигини исбатласын деп, бир муджизе истедилер. Бундан сонъ ‘Иса Аллаhкъа ду‘а этти ве аз вакъыт ичинде балыкъчыларнынъ агъы (сеть) балыкънен толды. Ве буны корьген сонъ, олар ‘Исагъа инандылар ве онынъ ярдымджылары олдылар.

‘Иса Пейгъамбер буюк ве ачыкъ-айдын муджизелерни япкъаны акъкъында имансызларнынъ де хаберлери олды ве олар ‘Исагъа къаршы чыкъмакъ ичюн бирлештилер. Ве онъа бойле дедилер: «Эгер сенинъ айткъанларынъ ве неге давет эткенинъ эписи догъру олса, буны тасдикъламакъ ичюн бизге чамырдан елькъанат (летучая мышь) яп ве о учып олсун.» Сонъ ‘Иса Пейгъамбер Аллаhкъа тевекюль этип, балчыкъны алды, ве ондан елькъанат япты ве устюне уфюрьген сонъ елькъанат учып кетти, амма корюнмейджек къадар узакъалашкъан сонъ олю тюшти.

‘Иса Пейгъамбернинъ башкъа муджизеси – бу Аллаhнынъ Ирадесинен инсанларны тедавийлемектир. Кёр догъгъанларгъа корьмекни ве джюзамлы олгъанларгъа (прокаженный) шифа (лечение) бере эди. Ондан гъайры ‘Иса Пейгъамбер олюлерни тирильте эди. Айталар ки, о Аллаhнынъ Ирадеси ве Къудрети иле дёрт инсанны тирильтти.

Пейгъамбер ‘Исанынъ джанландыргъан инсанлардан бириси онынъ досту ‘Азар (Лазарь, Эльазар) эди. ‘Иса Пейгъамбер онынъ къабирине келип, Аллаhкъа ду‘а этти ве сонъ бойле деди:  

قُمْ بإِذْنِ اللهِ

Манасы: «Аллаhнынъ Ирадеси иле тур». Сонъра ‘Азар мезарындан турды. Ве о даа чокъ йыл яшады ве онда даа бир бала олды.

Ондан гъайры ‘Иса Пейгъамбер Аллаhнынъ Ирадеси иле Ибн Аль-‘Аджуз деген инсанны ве бир укюмдарны джанландырды.

Лякин кяфирлер ‘Иса Пейгъамбернинъ косьтерген ачыкъ-айдын муджизелерине бакъмадан, оны пахыллап ве онъа инатлыкъ япып, бойле дедилер: «Сен якъын заманда ольгенлерни джанландырасынъ, бельким олар ольмедилер, эсини джойып я да башкъа бир хасталыкънен ята эдилер. Бизге Нухнынъ огълуны Самны тирильт.» ‘Иса Пейгъамбер айтты: «Онынъ мезарлыгъына мени алып барынъыз».

‘Иса Пейгъамбер Самнынъ мезарына келип, Аллаhкъа ду‘а этти. Аллаhнынъ Ирадесинен Сам дёрт бинъ йыл эвель ольгенине бакъмадан, мезарындан турды. Сам ‘Иса Пейгъамберге ишарет этип, инсанларгъа бойле хитап этти: «Онъа инанынъыз, акъикъаттен, о Пейгъамбердир».

Буны корьген базы инсанлар ‘Иса Пейгъамберге инандылар. Амма эп бир чокъусы инанмайып, бу ырымдыр дедилер. Пейгъамберлик девамында Пейгъамбер ‘Иса чокъ фаркълы муджизелерни косьтерди, биз бугунь анджакъ базыларыны анълаттыкъ.

Къур’анда («Аль-Хадид» Суресининъ, 25 Аетинде) буюрыла:

        ﴿لَقَدْ أَرْسَلْنا رُسُلَنَا بِالبَيِّنَاتِ﴾

Манасы: «Аллаh Ресуллерни ёллады ве оларгъа муджизе багъышлады».

Аллаh эр Пейгъамберге, айткъанлары ве давет эткен ёлу догъру олгъаныны тасдикълагъан муджизелерни багъышлады. Ве бу муджизелер саесинде инсанлар акъикъий Пейгъамберни яланджы Пейгъамберден айырып олгъанлар. Имам Аль-Бухарий Пейгъамбер Мухаммад ‘алейhиссалямдан бойле хадисни ривает этти:

الأنبياءُ إخوةٌ لِعَلّات، دينُهم واحدٌ وأُمَّهَاتُهُمْ شَتَّى وأنَا أوْلَى النَّاسِ بعِيسَى ابْنِ مَرْيمَ لَيْسَ بَيْنِي وَبَيْنَه نَبِيّ

Манасы: «Бутюн Пейгъамберлер бири-бирине дин къардашлар. Оларнынъ дини бирдир (Ислям), амма Шари‘атлары фаркълы. Ве ‘Исадан сонъра кельген  Пейгъамбер – мен ве бизим арамызда Пейгъамбер ёкъ эди».

Омюримизни иман ве ибадет иле кечирмеге, ве бу дюньяны тёвбе, ве иман иле терк этмеге Аллаh бизге насип эйлесин деп Ду`а этемиз.

 هَذَا وَأَسْتَغْفِرُ اللَّهَ لِي وَلَكُمْ 
---------------------------------------------------------------------------------------------------------------- 
إِنَّ الْحَمْدَ لِلَّهِ نَحْمَدهُ وَنَسْتَغْفِرُهُ وَنَسْتَعِينُهُ وَنَسْتَهْدِيهِ وَنَعُوذُ بِاللهِ مِن شُرُورِ أَنفُسِنَا وَمِن سَيِّئَاتِ أَعْمَالِنَا، مَن يَهْدِ اللهُ فَلاَ مُضِلَّ لَهُ وَمَن يُضْلِلْ فَلاَ هَادِيَ لَهُ، والصلاةُ والسلامُ على سيِّدِنا محمد الصادِقِ الوَعْدِ الأَمينِ وعلى إِخْوَانِهِ النبيِّين والمُرسَلين. ورَضِيَ اللهُ عن أُمَّهاتِ المُؤمنين وآلِ البيتِ الطَّاهِرِين وعن الخُلَفَاءِ الرَّاشِدين أبي بكرٍ وعمرَ وعُثْمانَ وعليّ وعن الأَئِمَّةِ المُهْتَدِين أبي حبيفةَ ومالكٍ والشَّافعيِّ وأحمدَ وعن الأولياءِ والصالحين. أمَّا بعدُ عِبَادَ اللهِ فإنِّي أُوصِيكُمْ وَنَفْسِيَ بِتَقْوَى اللهِ العَليِّ الْعَظِيمِ فَاتَّقُوهُ. 
واعْلَمُوا أنَّ اللهَ أمَرَكُمْ بِأَمرٍ عظيمٍ، أَمَرَكُم بالصلاةِ والسلامِ على نبيِّهِ الكَريمِ فقال في مُحْكَمِ تَنْزِيلِهِ: ﴿ إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا﴾ 
اللَّهُمَّ صَلِّ عَلَى سَيِّدِنَا مُحَمَّدٍ وَعَلَى آلِ سَيِّدِنَا مُحَمَّدٍ كَمَا صَلَّيْتَ عَلَى سَيِّدِنَا إِبْرَاهِيمَ وَعَلَى آلِ سَيِّدِنَا إِبْرَاهيمَ وَبَارِكْ على سيّدِنا مُحمدٍ وَعلى آلِ سيِّدِنا مُحمدٍ كما بارَكْتَ على سيِّدِنا إبراهيمَ وعلى آلِ سيدِنا إبراهيمَ في العالَمِينَ إِنَّكَ حَمِيدٌ مَجِيد 
اللَّهُمَّ اغْفِرْ لِلْمُؤْمِنِينَ وَالْمُؤْمِنَاتِ الأَحْيَاءِ مِنْهُمْ وَالأَمْوَات