Пейгъамбер Мухаммад ‘алейhиссалямнынъ базы муджизелери

Категория: Джума хутбеси Просмотров: 636

إِنَّ الْحَمْدَ لِلَّهِ نَحْمَدهُ وَنَسْتَغْفِرُهُ وَنَسْتَعِينُهُ وَنَسْتَهْدِيهِ وَنَعُوذُ بِاللهِ مِن شُرُورِ أَنفُسِنَا وَمِن سَيِّئَاتِ أَعْمَالِنَا، مَن يَهْدِ اللهُ فَلاَ مُضِلَّ لَهُ وَمَن يُضْلِلْ فَلاَ هَادِيَ لَهُ، وَأَشْهَدُ أَن لاَ إِلهَ إِلاَّ اللهُ وَحْدَهُ لاَ شَرِيكَ لَهُ ولا مَثِيلَ له ولا ضِدَّ له ولا نِدَّ له، وَأَشْهَدُ أَنَّ سَيِّدَنَا وحَبِيبَنا وعظيمَنا وقائدَنا وقُرَّةَ أَعْيُنِنا مُحَمَّدًا عَبْدُهُ وَرَسُولُهُ وصَفِيُّهُ وحبيبُهُ صَلَوَاتُ اللهِ وَسَلاَمُهُ عَلَيْهِ وَعَلَى كُلِّ رَسُولٍ أَرْسَلَه. الصلاةُ والسلامُ عليكَ سيِّدي يا رسولَ الله. الصلاةُ والسلامُ عليكَ يا سيِّدي يا صاحِبَ الذِّكرَى يا أبا القاسِم يا أبا الزَّهْراءِ يا محمد. أَمَّا بَعدُ عِبَادَ اللهِ، فإني أُوصِيكُمْ وَنَفْسِيَ بِتَقْوَى اللهِ الْعَلِيِّ الْقَديرِ القائلِ في مُحْكَمِ كتابِه:

﴾ يَاأَيُّهَا الَّذِينَ آمَنُوا اتَّقُوا اللَّهَ وَلْتَنْظُرْ نَفْسٌ مَا قَدَّمَتْ لِغَدٍ وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ ﴿

Къудретли, Екяне Яратыджыгъа хамд олсун. Аллаh бутюн нокъсанлыкълардан мунезехтир, О Екяне ве болюнмей. Аллаh догъмады ве догъурмады, О ич бир шейге ве ич кимсеге бенъземей. Аллаh мекянгъа ве вакъыткъа мухтадж дегиль, О Эбедий ве Сонъсуздыр.

Юдже Аллаh Пейгъамбер Мухаммад ‘алейhиссалямгъа даа чокъ шереф ве улулыкъ багъышласын. Бизим Пейгъамберге ве башкъа бутюн Пейгъамберлерге салят ве селям олсун! Эм де Пейгъамбер Мухаммад ‘алейhиссалямнынъ апайларына, онынъ мусульман сойларына ве несилине де селям олсун! Аллаh эренлерге ве такъвалы Пейгъамбернинъ девамджыларына рахмет багъышласын деп, Ду‘а этемиз.

Юдже Аллаh Пейгъамберлерге айры бир муджизелерни берди. Пейгъамберлернинъ муджизелери – бу аджайип ве февкъульаде адиселер. Муджизелер Пейгъамберге онынъ акъикъатыны тасдикъламакъ ичюн берильди. Ве бу киби муджизелерге ич бир шей къаршы оламаз. Чокъусы Пейгъамберлернинъ муджизелери белли, амма энъ аджайип Пейгъамбер Мухаммад ‘алейhиссалямнынъ муджизелери эди.

Мукъаддес Къур`ан – бу Пейгъамбер Мухаммад ‘алейhиссалямнынъ энъ буюк муджизеси эди, о шимдигедже девам эте. Къур`анда биринджи арифтен башлап, сонъки арифинедже эр шей керчектир. О ич бир вакъыт денъишмез ве Къыямет кунюнедже къорчаланаджакъ.

Араплар эдебиятны ве шиириетни пек яхшы бильген заманда, Къур`ан эндирильген эди. Араплар тиллерини яхшы бильгенлерине бакъмадан, Къур`анны эшиткенде, онъа къаршы ве онъа тенъ олгъан ич бир шей япып оламадылар.

Къур`аннынъ метини мукеммель ве дюльбер, бу акъкъында 88 Аетте, «Аль-Исра`» Суресинде айтыла:

قُل لَّئِنِ اجْتَمَعَتِ الإِنسُ وَالْجِنُّ عَلَى أَن يَأْتُواْ بِمِثْلِ هَذَا الْقُرْآنِ لاَ يَأْتُونَ بِمِثْلِهِ وَلَوْ كَانَ بَعْضُهُمْ لِبَعْضٍ ظَهِيرًا

Манасы: «Эгер адамлар ве джиннлер къошулышып эм де бири-бирине ярдым эткен олсалар биле, Мукъаддес Къур`ан киби бир шей язып оламаздылар».

  Пейгъамбер Мухаммад ‘алейhиссалямнынъ юксек дереджесини косьтерген, Исра’ ве Миʻрадж муджизесидир. Исра – бу Пейгъамбер Мухаммад ‘алейhиссалямнынъ Джибраильнен берабер Буракъ денильген Дженнет айваннынъ устюнде Мекке шеэринден Къудс шеэрине гедже япылгъан аджайип сеяатыдыр. Исра` сеяатында Пейгъамберимиз ‘алейhиссалям чокъ аджайип шейлерни корьди ве айры бир ерлерде намаз къылды. Къудс шеэриндеки Аль-Акъса джамисинде Пейгъамбер Мухаммад ‘алейhиссалямнен корюшмек ичюн, ондан эвель олгъан эписи Пейгъамберлер топландылар. Бундан сонъ Пейгъамбер Мухаммад ‘алейhиссалям коклерге ве сонъра коклерден даа юксеклерге котерильди. Миʻраджда Пейгъамбер Мухаммад ‘алейhиссалям Мелеклерни, Дженнетни, ʻАршны ве Аллаh яраткъан даа башкъа шейлерни корьди. Пейгъамберимизнинъ аджайип сеяаты гедженинъ учьтен бир вакъыты ичинде олып кечти.

Пейгъамбер Мухаммад ‘алейhиссалям аджайип муджизелерден бири – бу айнынъ экиге болюнмеси. Бу муджизе акъкъында Къур`анда «Аль-Къамар» Суреси, 1 Аетте айтыла:

اقْتَرَبَتِ السَّاعَةُ وَانشَقَّ الْقَمَرُ

Манасы: «Къыямет кунюнинъ якъынлашкъан аляметлеринден бири – бу айнынъ болюнмеси».

Пейгъамбер Мухаммад ‘алейhиссалямнынъ башкъа аджайип муджизелеринден бири – бу онынъ пармакъ арасындан сувнынъ чыкъмасы. Буны чокъ инсанлар корьди.

Пейгъамбер Мухаммад ‘алейhиссалямнен айванлар лаф эте эдилер. Меселя, деве озь саиби акъкъында Пейгъамберимизге шикяет эте эди. Даа Пейгъамберимизнинъ янында джансыз предметлер озь дуйгъуларыны бильдире эдилер. Меселя, къуругъан пальма терегининъ агъламасы, Пейгъамберимизнинъ къолунда олгъан ашнынъ «Субханаллаh» зикрни айтмасы.

Пейгъамбер Мухаммад ‘алейhиссалям бир путперест арапны Ислямгъа давет эткен вакъытта, Пейгъаберимиз терекни озюне чагъырды. Терек онынъ янына келип, учь кере Шеhадетни айтты, арап исе буны корип, Ислям динини къабул этти.

Пейгъамбер Мухаммад ‘алейhиссалям адамларны да тедавийлей эди. Бир савашта Къатада сахабенинъ козю яраланды. Бу козьни кесип аладжакъ эдилер, амма Пейгъамберимиз бу козьни элинен тутып, ерине къойды. Сахабенинъ бу козю эвелькиси киби яхшы корьмеге башлады. Ондан сонъ Къатада сахабе козьлеринден къайсы яралангъаныны унутты, чюнки эки козю де яхшы коре эди.

Пейгъамбер Мухаммад ‘алейhиссалямдан берекети олгъаны ичюн, аз аш чокъ адамгъа ете эди. Бир кунь Абу hурайраh Пейгъамберимизге йигирми бир хурма кетирди ве Пейгъамберимизден бу хурмаларда берекет олгъаныны истеди. Пейгъамбер Мухаммад ‘алейhиссалям эр бир хурмагъа «Басмаля окъуды. Сонъра бир топлум адамларнынъ кельмесини эмир этти. Бу адамлар келип, тойгъандже бу хурмаларны ашадылар. Бойле этип, бир къач кере адамлар топлашып, бу хурмаларны ашадылар, амма хурмалар битмеди. Ондан сонъ Пейгъамберимиз ве Абу hурайраh бу хурмаларны ашадылар ве хурмалар эп бир къалды. Пейгъамбер Мухаммад ‘алейhиссалям бу хурмаларны териден япылгъан торбачыкъкъа къойып, бойле деди: «Эй, Абу hурайраh! Ач олгъанда къолуны торбагъа сокъып, андан бир хурма ал».

Абу hурайраh деди ки, бу хурмаларны о озю Пейгъамбер Мухаммад ‘алейhиссалям, Абу Бакр, ‘Умар эм де ‘Усманнынъ заманынадже ашады. Абу hурайраh айтты ки, Пейгъамбер Мухаммад ‘алейhиссалямгъа бир бардакъ сют кетиргенлер ве бу сют 200 адамгъа етти.

Пейгъамбер Мухаммад ‘алейhиссалямнынъ башкъа белли олгъан муджизелери:

  • Пейгъамбер Мухаммад ‘алейhиссалямнынъ сахабелери чукъур къазгъанда пек балабан бир ташкъа расткельдилер, оны сындырып оламадылар. Пейгъамбер Мухаммад ‘алейhиссалям учь кере «Бисмилляhир-Pахманир-Pахим» деп, текменнен бу ташны урды. Бу таш парчаланды.
  • Бир сахабенинъ бабасы ольген сонъ, онынъ чокъ борджу къалды. Сахабе Пейгъамбер Мухаммад ‘алейhиссалямгъа келип, бойле деди: «Бабамнынъ чокъ борджу къалды, оларны одемек ичюн менде олгъан хурма етмез». Ве Пейгъамберимизден ярдым истеди. Пейгъамберимиз хурма обасыны айланып, сонъра экинджисини айланып кечти ве сахабеге деди: «Хурмаларны сай». Сахабе хурмаларны сайгъан сонъ, олар эм борджны одемеге эм де озюне етеджегини анълады.

Юдже Аллаh Пейгъамбер Мухаммад ‘алейhиссалямгъа чокъ муджизе багъышлады. Базы алимлернинъ айткъанына коре, оларнынъ сайысы учь бинъдир.

Аллаh бизге Пейгъамберимизден берекетленмеге эки дюньяда да насип этсин.