Къурбан байрамы хутбеси

Категория: Джума хутбеси Просмотров: 3881

اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ،

اللهُ أَكْبَرُ، اللهُ أَكْبَرُ، اللهُ أَكْبَرُ، اللهُ أَكْبَرُ.

إِنَّ الْحَمْدَ لِلَّهِ نَحْمَدهُ وَنَسْتَغْفِرُهُ وَنَسْتَعِينُهُ وَنَسْتَهْدِيهِ وَنَعُوذُ بِاللهِ مِن شُرُورِ أَنفُسِنَا وَمِن سَيِّئَاتِ أَعْمَالِنَا، مَن يَهْدِ اللهُ فَلاَ مُضِلَّ لَهُ وَمَن يُضْلِلْ فَلاَ هَادِيَ لَهُ، وَأَشْهَدُ أَن لاَ إِلهَ إِلاَّ اللهُ وَحْدَهُ لاَ شَرِيكَ لَهُ ولا مَثِيلَ له ولا ضِدَّ له ولا نِدَّ له، وَأَشْهَدُ أَنَّ سَيِّدَنَا وحَبِيبَنا وعظيمَنا وقائدَنا وقُرَّةَ أَعْيُنِنا مُحَمَّدًا عَبْدُهُ وَرَسُولُهُ وصَفِيُّهُ وحبيبُهُ صَلَوَاتُ اللهِ وَسَلاَمُهُ عَلَيْهِ وَعَلَى كُلِّ رَسُولٍ أَرْسَلَه. الصلاةُ والسلامُ عليكَ سيِّدي يا رسولَ الله. الصلاةُ والسلامُ عليكَ يا سيِّدي يا صاحِبَ الذِّكرَى يا أبا القاسِم يا أبا الزَّهْراءِ يا محمد. أَمَّا بَعدُ عِبَادَ اللهِ، فإني أُوصِيكُمْ وَنَفْسِيَ بِتَقْوَى اللهِ الْعَلِيِّ الْقَديرِ القائلِ في مُحْكَمِ كتابِه:

﴾يَاأَيُّهَا الَّذِينَ آمَنُوا اتَّقُوا اللَّهَ وَلْتَنْظُرْ نَفْسٌ مَا قَدَّمَتْ لِغَدٍ وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ﴿

Кяинатнынъ Раббине, эр шейни яраткъан ве къулларыны Ахиретте тирильткен, Екяне Аллаhкъа хамд олсун. Аллаh ич бир шейге ве ич кисеге мухтадж дегиль. Биз исе, Онъа мухтаджмыз. Аллаh бизим гуняхларымызны афу этсин, бизге Рахмет багъышласын ве бизни къорчаласын деп, Онъа ду‘а` этемиз. Яратыджымыз чокъ мусульманларнынъ гуняхларыны афу этип базы гуняхкяр мусульманларгъа ве бютюн имансызларгъа шиддетли азап береджек. Керчектен де, кимге Аллаh иман багъышлады, о бахытлы ве эйиликтедир. Амма кимге Аллаh акъикъий ёлуны бермеди, о бахытсыз ве онынъ алы пек мушкюльдир.

Бизден эр ким хайыр япкъанда, тек озюне файда кетире, яманлыкъ япкъанда исе, тек озюне зарар кетире. Керчектен де, Аллаh Адалетли ве ич кимсени зулум этмей. Озь Рахметинен кимге истесе, онъа мукяфат багъышлай. Адалети иле джезалай ве имтиан бере.

Аллаh Пейгъамберимизге, ‘алейhиссалям, Рахмет ве улулыкъ багъышласын. Пейгъамберимиз омур бою бизни яхшылыкъкъа, хидаетке, Аллаhнынъ эмирлерини эда этмеге давет этти. Бютюн Пейгъамберлерге, эвлияларгъа, шеhитлерге салят ве селям олсун.

Урьметли динъ къардашларым!!! Эпинъизни такъвалы олмагъа чагъырам. Яратыджынынъ буюргъаныны япынъыз ве гуняхлардан къачынынъыз.

Къур`анда («Ас-Саффат» Суресинде, 107 Аетте) айтыла:

وَفَدَيْنَاهُ بِذِبْحٍ عَظِيمٍ

манасы: «Аллаhу Та’аля Ибраhим Пейгъамберге, ‘алейhиссалям, къурбан кесмек ичюн озь огълы ерине  къой багъышлады».

Урьметли дин къардашларым! Бутюн дюнья мусульманлары Зуль-Хидджаh айнынъ онунджы куню Къурбан байрамыны къайд этелер. Бу байрамда Аллаh мусульманларгъа чокъ хайыр, эйилик, шерден къорчалав ве имтианларда сабыр берсин деп, дуʻа` этемиз. Бу мубарек Къурбан байрам сабасында Пейгъамберимиз Мухаммад ‘алейhиссалям япкъаны киби, хаджылар да къуюгъа таш атма ибадетини япалар. Бу амельнинъ манасы ве себеби: Ибраhим Пейгъамбер, ‘алейhиссалям, огълуны къурбан этмек ичюн кеткенде шейтан 3 кере огуне чыкъты ве щейтанынъ тургъан ерлерге Ибраhим Пейгъамбер учер кере таш аткъан. Бунынъ ичюн хаджылар да о ерлерге 3 кере таш аталар.

Мубарек Къурбан байрамынынъ эмиети чокъ буюктир. Ве шу куню къурбан кесмек айры бир ибадет сайыля. Пейгъамбер Ибраhим, Аллаhнынъ берген бутюн имтианлардан сабыр ве джесюрликнен кечти. Аллаh Къур`анда («Аль-`Анбия» Суресинде, 51 Аетте) буюрды:

وَلَقَدْ آتَيْنَا إِبْرَاهِيمَ رُشْدَهُو مِنْ قَبْلُ وَكُنَّا بِهِ عَالِمِينَ

Манасы: «Аллаhу Та’аля Ибраhим Пейгъамберни, ‘алейhиссалям, догъулгъанынданъ берли мухафаза эте».

Пейгъамбер Ибраhим, ‘алейhиссалям, озь умметини йыдызларгъа, путларгъа ве чешит суретлерге дегиль де, Екяне олгъан Аллаhкъа ибадет этмеге давет эте эди.

Сайгъылы мусульманлар! Пейгъамбер Ибраhим озь огълуны, Исма’ильни Аллаh ичюн къурбан эткенини руясында корьди. Пейгъамберлернинъ руялары Аллаhтан вахий олгъаныны эпимиз билемиз, ве руяларында корьгенлерини мытлакъ ерине кетирмек кереклер. Онынъ ичюн Пейгъамбер Ибраhим ‘алейhиссалям огълуны къурбан этмеге ниетленди ве огълуна бойле деди: «Аллаh ризасы ичюн къурбан кесмеге кетемиз.» Ибраhим ‘алейhиссалям пычакъ ве йип алып, огълунен берабер дагъларгъа кетти. Огълу бабасындан сорады: «Къайда къурбан?» Пейгъамбер Ибраhим бойле джевап берди: «Огълум, мен руяда сени къурбан оларакъ кескенимни корьдим.» Исмаил исе бойле айтты: «Мени яхшы байла, къан сенинъ урбаларны кирлетмесин, чюнки анам корсе кедерленир. Пычакъ богъазымдан тез кечсинъ ве анамын янына баргъанда менден селям айт.» Ондан сонъ Ибраhим огълуны опьти ве агълап бойле деди: «Аллаhнынъ эмирлерини кутьмек ичюн манъа буюк ярдымджысынъ.» Бунданъ сонъ Пейгъамбер Ибраhим пычагъыны алып, кесмеге башлады, факъат пычакъ кесмеди. Ондан сонъ Ибраhим ‘алейhиссалям Мелекнинъ айткъан сёзлерини эшитти: ''Сен руянда корьгенини япмагъа тырыштын, баланъ ерине къой берильди'', яни къурбан оларакъ Исм’аильнинъ ерине къой союлды.

Бу икяе бизге эм къуванчта эм беляда даима такъвалы олмагъа ве Юдже Аллаhа умют этмеге огрете. Айырыджа Пейгъамберлернинъ бутюн яратылгъанлардан энъ яхшы ве энъ фазилетли олгъанларыны бизлерге  бир даа тасдикълай.

Аллаhнынъ къуллары! Къурбан – тасдикълангъан бир Суннеттир.

Анас ибн Малик ривает эткенине коре, Пейгъамберимиз Мухаммад ‘алейhиссалям эки къой къурбан эте эди. Къурбаннынъ устюнлиги акъкъында Айше анамыз Пейгъамбер Мухаммад ‘алейhиссалямнынъ бойле сезлерини ривает этти:


ضَحُّوا وَطَيِّبُوا أَنْفُسَكُمْ فَإِنَّهُ مَا مِنْ مُسْلِمٍ يَسْتَقْبِلُ بِذَبِيحَتِهِ الْقِبْلَةَ إِلَّا كَانَ دَمُهَا وَفَرْثُهَا وَصُوفُهَا حَسَنَاتٍ فِي مِيزَانِهِ يَوْمَ الْقِيَامَة

Манасы: «Къурбан кескенде эр мусульман Кя‘беге ёнелип буны джан-юректен япсын, Къыямет кунюнде бу къурбан онынъ ичюн савап оладжакътыр».

Не вакъыт къурбан кесиле? Къурбан байрам Намазындан сонъ кесиле, яни эки рекят намаз ве эки хутбе окъулгъан вакъыт кечкен сонъ къурбан кесиле. Бундан эвель кесильген, къурбан къабул олунмаз. Къурбан байрамнынъ дёртюнджи куню кунеш баткъанынадже къурбан кесмеге мумкюн. Имамлар Муслим ве Бухарий ривает эткен Хадисте бойле айтыла, Пейгъамберимиз Мухаммад ʻалейhиссалям Къурбан байрам кунюньде, байрам Намаздан сонъ бойле деди:

مَنْ صَلَّى صَلَاتَنَا هَذِهِ وَنَسَكَ نُسْكَنَا فَقَدْ أَصَابَ سُنَّتَنَا وَمَنْ نَسَكَ قَبْلَ صَلَاتِنَا فَتِلْكَ شَاةُ لَحْمٍ فَلْيَذْبَحْ مَكَانَهُ

Манасы: «Бизнен берабер намаз къылып , къурбан кескенлер - догъру япкъанлар ве Суннетимизни ерине кетиргенлер. Амма намаздан эвель айван сойгъанларнынъ, къурбанлары къабул олунмагъан ве олар текрар сойсынлар».  Къурбан союв мюддети Къурбан байрамнынъ дёртюнджи куню кунеш баткъангъадже девам эте.

Эгер инсан къурбан айваныны Кяʻбеге ёнелип сойса ве "Бисмилляh, Аллаhу Акбар" айтса пек яхшы олур, эм де бу сёзлерни айтмагъа да яхшыдыр: "Аллаhумма такаббаль минни "(къурбанымны къабул эт.)

Къурбан эти учьке болюне: бир къысмыны фукъарелерге, дигер къысмыны акъраба ве къомшуларгъа бериле, къалгъаныны озюне къалдырыла. Къурбан эти ве териси сатылмаз, бундан къасап акъкъы оденмез. Къурбан чалан инсан истесе, бутюн айванны биревлерге багъышламагъа да мумкюн.

Базы инсанлар санки Пейгъаберимиз къурбан кесмеге имкяны олгъан, амма кесмегенлер акъкъында «Джамиге кельме» дегенини айталар,- бу созлер яландыр, бойле бир Хадис ёкъ.

Сайгъылы мусульманлар! Къурбангъа ляйыкъ олгъан айванлар: къой – бир яшында, эчки – эки яшында, сыгъыр (богъа) – эки яшындан зияде, деве – беш яшындан зияде олмалы. Къой ве эчки тек бир адамнынъ адындан кесилир; сыгъыр, богъа, деве исе еди адамгъадже бирлешип, оларнынъ адларындан къурбан кесилир. Мухаддис Джабир Пейгъамбер Мухаммад ‘алейhиссалямнынъ бойле Хадисини ривает этти:

لَا تَذْبَحُوا إِلَّا مُسِنَّةً إِلَّا أَنْ تَعْسُرَ عَلَيْكُمْ فَاذْبَحُوا جَذَعَةً مِنَ الضَّأْنِ

Манасы: «Эгер чаре олса,  яшы буюк олгъан айванны кесинъиз, лякин бу къыйын олса, бир яшында бир  къой кесинъиз.»

Бу къусурлары олгъан айванлар къурбан этильмез: бир козю олмаса, топал олса, я да тыштан корюнген эр анги хасталыгъы олса – бу айван къурбан оларакъ кесильмей. Къурбангъа ляйыкъ олгъан айванлар акъкъында  бильген адамлардан сорамалы ве тавсилятлыджа огренмели. Кесильген айваннынъ терисини бир иш ичюн уджрет оларакъ бермек ясакътыр, амма садакъа оларакъ бермеге мумкюн. Ислям алимлери Къурбаннынъ ич бир шейини сатмагъа кесинликле олмагъаныны акъкъында дедилер.

Аллаhу Та’аля джюмлемизге Къурбан байрамыны сагъ-селямет къаршыламагъа ве оны яхшы кечирмеге насип эйлесин ве япкъан ибадетлеримизни къабул этсин. Гунахларымызны афу этип, бизге Дженнетни багъышласын ин ша` Аллаh.

هَذَا وَأَسْتَغْفِرُ اللَّهَ لِي وَلَكُمْ

----------------------------------------------------------------------------------------------------------

إِنَّ الْحَمْدَ لِلَّهِ نَحْمَدهُ وَنَسْتَغْفِرُهُ وَنَسْتَعِينُهُ وَنَسْتَهْدِيهِ وَنَعُوذُ بِاللهِ مِن شُرُورِ أَنفُسِنَا وَمِن سَيِّئَاتِ أَعْمَالِنَا، مَن يَهْدِ اللهُ فَلاَ مُضِلَّ لَهُ وَمَن يُضْلِلْ فَلاَ هَادِيَ لَهُ، والصلاةُ والسلامُ على سيِّدِنا محمد الصادِقِ الوَعْدِ الأَمينِ وعلى إِخْوَانِهِ النبيِّين والمُرسَلين. ورَضِيَ اللهُ عن أُمَّهاتِ المُؤمنين وآلِ البيتِ الطَّاهِرِين وعن الخُلَفَاءِ الرَّاشِدين أبي بكرٍ وعمرَ وعُثْمانَ وعليّ وعن الأَئِمَّةِ المُهْتَدِين أبي حنيفةَ ومالكٍ والشَّافعيِّ وأحمدَ وعن الأولياءِ والصالحين. أمَّا بعدُ عِبَادَ اللهِ فإنِّي أُوصِيكُمْ وَنَفْسِيَ بِتَقْوَى اللهِ العَليِّ الْعَظِيمِ فَاتَّقُوهُ.

واعْلَمُوا أنَّ اللهَ أمَرَكُمْ بِأَمرٍ عظيمٍ، أَمَرَكُم بالصلاةِ والسلامِ على نبيِّهِ الكَريمِ فقال في مُحْكَمِ تَنْزِيلِهِ: ﴿ إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا﴾
اللَّهُمَّ صَلِّ عَلَى سَيِّدِنَا مُحَمَّدٍ وَعَلَى آلِ سَيِّدِنَا مُحَمَّدٍ كَمَا صَلَّيْتَ عَلَى سَيِّدِنَا إِبْرَاهِيمَ وَعَلَى آلِ سَيِّدِنَا إِبْرَاهيمَ وَبَارِكْ على سيّدِنا مُحمدٍ وَعلى آلِ سيِّدِنا مُحمدٍ كما بارَكْتَ على سيِّدِنا إبراهيمَ وعلى آلِ سيدِنا إبراهيمَ في العالَمِينَ إِنَّكَ حَمِيدٌ مَجِيد

اللَّهُمَّ اغْفِرْ لِلْمُؤْمِنِينَ وَالْمُؤْمِنَاتِ الأَحْيَاءِ مِنْهُمْ وَالأَمْوَات