Центральное духовное управление мусульман - Таврический муфтият - Мелеклерге иман

Мелеклерге иман


إِنَّ الْحَمْدَ لِلَّهِ نَحْمَدهُ وَنَسْتَغْفِرُهُ وَنَسْتَعِينُهُ وَنَسْتَهْدِيهِ وَنَعُوذُ بِاللهِ مِن شُرُورِ أَنفُسِنَا وَمِن سَيِّئَاتِ أَعْمَالِنَا، مَن يَهْدِ اللهُ فَلاَ مُضِلَّ لَهُ وَمَن يُضْلِلْ فَلاَ هَادِيَ لَهُ، وَأَشْهَدُ أَن لاَ إِلهَ إِلاَّ اللهُ وَحْدَهُ لاَ شَرِيكَ لَهُ ولا مَثِيلَ له ولا ضِدَّ له ولا نِدَّ له، وَأَشْهَدُ أَنَّ سَيِّدَنَا وحَبِيبَنا وعظيمَنا وقائدَنا وقُرَّةَ أَعْيُنِنا مُحَمَّدًا عَبْدُهُ وَرَسُولُهُ وصَفِيُّهُ وحبيبُهُ صَلَوَاتُ اللهِ وَسَلاَمُهُ عَلَيْهِ وَعَلَى كُلِّ رَسُولٍ أَرْسَلَه. الصلاةُ والسلامُ عليكَ سيِّدي يا رسولَ الله. الصلاةُ والسلامُ عليكَ يا سيِّدي يا صاحِبَ الذِّكرَى يا أبا القاسِم يا أبا الزَّهْراءِ يا محمد. أَمَّا بَعدُ عِبَادَ اللهِ، فإني أُوصِيكُمْ وَنَفْسِيَ بِتَقْوَى اللهِ الْعَلِيِّ الْقَديرِ القائلِ في مُحْكَمِ كتابِه:
﴿ يَاأَيُّهَا الَّذِينَ آمَنُوا اتَّقُوا اللَّهَ وَلْتَنْظُرْ نَفْسٌ مَا قَدَّمَتْ لِغَدٍ وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ﴾


Екяне Яратыджыгъа, Къудретли, эр шейни яраткъан Аллаhкъа хамд олсун. Мусульманлардан кимге истесе, Озь Рахметинен гуняхларыны афу этиджидир. Ортагъы олмагъан, ич кимсеге, ич бир шейге ошамагъан, шекильге мухтадж олмагъан ве эр шейни эшиткен ве бильген Аллаhкъа хамд олсун. Озь Ирадесинен не истесе, оны ярата ве япа. Бизге берген берекети ичюн Аллаhкъа шукюрлер олсун.

Аллаh Пейгъамбер Мухаммад, ‘алейhиссалямгъа Рахмет ве улулыкъ багъышласын. О бизни яхшылыкъкъа, хидаетке, Аллаhнынъ эмирлерини япмагъа давет этти. Ресуллерден ве Пейгъамберлерден энъ улу олгъан Мухаммад, ‘алейhиссалям ‘Абдуллаhнынъ огълуна салят ве селям олсун. Ве эписи онынъ несилине ве сахабелерине де селямлар олсун. Эм де башкъа бутюн Пейгъамберлерге салят ве селям олсун. Эпинъизни такъвалы олмагъа чагъырам. Яратыджынынъ буюргъаныны этинъиз ве гунях япманъыз. Аллаh бизге Рахмет багъышласын!

Къурʼанда («Аль ʻИмран» Суреде, 102 Аети) буюрыла:


﴿ يَا أَيُّهَا الَّذِينَ آَمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ ﴾


Манасы: «Эй, мусульманлар! Аллаhтан керчек, самимий, такъвалыкъ иле къоркъун ве анджакъ мусульман оларакъ джан беринъиз».
Эм де Мукъаддес Къурʼанда («Ан-Нисаʼ» Суреси, 136 Аетте) айтыла:


﴿ وَمَنْ يَكْفُرْ بِاللَّهِ وَمَلَائِكَتِهِ وَكُتُبِهِ وَرُسُلِهِ وَالْيَوْمِ الْآَخِرِ فَقَدْ ضَلَّ ضَلَالًا بَعِيدًا ﴾


Манасы: «Ким Аллаһнынъ Мелеклерине, эндирильген Мукъаддес Китапларына, Ресуллерине ве Къыямет кунюне инанмаса, о мушкюль сапыкълыкъта булуна».
Билинъиз ки, сайгъылы мусульманлар! Мелеклернинъ бар олгъанына инанмакъ керек. Оларнынъ сезильмеген, айдын бедени бар, олар нурдан яратылды. Мелеклер тири, оларнынъ джаны бар. Мелеклернинъ джанлары фахрий ве шерефли. Мелеклер – Аллаһнынъ шерефли къулларыдыр.
Мелеклер эркек ве къадын дегиллер. Мелеклер ашамайлар, ичмейлер, юкъламайлар, болдурмайлар, догъурмайлар, Аллаhнынъ эмирлерини япалар. Мелеклер мукалляф ве оларда сечим мевджуттир, амма олар тек Аллаhкъа итаатны сечелер. Олар гунях япмайлар ве Аллаhнынъ эписи эмирлерини ерине кетирелер.
Мелеклер арасында Аллаh базыларыны башкъалардан юксельтти. Инсанлар арасында Аллаh Пейгъамберлерни сечти ве Пейгъамбер арасындан Ресуллерни. Бойлеликнен, эр Ресуль Пейгъамбердир, амма эр Пейгъамбер Ресуль дегильдир. Мелек ве инсан Ресуль ола билир.
Пейгъамберлер – Аллаhнынъ яраткъанларындан энъ яхшыларыдыр. Олар Мелеклерден даа эйидирлер. Пейгъамберлерден сонъ энъ яхшы баш Мелеклери: Джибриль, Микаʼиль, Исрафиль, ‘Aзраʼиль, Ридуан (Дженнетни къоруй), Малик (джеhэннемни къоруй) ве иляхри. Мелеклерден сонъ адамлар арасында энъ яхшы – эвлиялардыр. Оларнынъ иманы къавий ве олар Аллаhнынъ буюргъанларыны кутелер.
Бу эвлиялардан сонъ дереджелерине коре, башкъа Мелеклер кете. Мелеклерден сонъ эвлияларнынъ дереджесине даа етмеген такъвалы мусульманлар кете. Олардан сонъ япкъан амеллерине коре башкъа мусульманлардыр.
Эписи Мелеклер месулиетлидир. Оларда, Аллаһ эмир эткен, айры вазифелери бар. Оларнынъ арасында: базылары ягъмургъа, башкъалары осюмликлерге джевапкярлар, дигерлери адамларнынъ амеллерини язалар, базы Мелеклерге адамларнынъ джанларыны алмагъа вазифе берильди, базылары исе инсанларны джиннлерден къорчалайлар. Эгер инсанларны къорчалагъан Мелеклер олмаса эди, джиннлер инсанларнен топ киби ойнар эдилер. Мелеклер инсанларны къорчалайлар, амма бунен берабер Аллаһ такъдир эткен шейлерге къаршы чыкъмайлар.
Мелеклер арасында Пейгъамберимизге салям кетиргенлер де бар. Тереклерден эр тюшкен япракъны сайып язгъан Мелеклер де бар. Мелек Ратаʼиль белягъа тюшкен инсанны теселли эте. Ананынъ къарнында олгъан балагъа къыяфет берген Мелеклер де бар. Ёлуны джойгъан инсанларгъа догъру ёлуны тапмагъа ярдым эткен Мелеклер де бар. Мункар ве Накир Мелеклер къабирде ольгенлерден соргъу сорайлар. Гуняхкярларны джеhэннемде джезалагъан Мелеклер де бар. Амма Аллаһ ойле япты ки, Мелеклер озьлери чекишмейлер.
Мелеклернинъ нурдан яратылгъаны акъкъында Пейгъамбер Мухаммад ʻалейһиссалямнынъ Хадисинде бойле айтыла:

خُلِقَتِ الْمَلَائِكَةُ مِنْ نُورٍ وَخُلِقَ الْجَآنُّ مِنْ مَارِجٍ مِنْ نَارٍ وَخُلِقَ ءَادَمُ مِمَّا وُصِفَ لَكُمْ

Манасы: «Мелеклер нурдан яратылды, джиннлер исе атешнинъ тёпесинде олгъан алевден яратылды. Адемнинъ яратылгъаны акъкъында айтылгъан эди». Яни ерден. Эписи Мелеклер яратылгъан ве шимди де барлар.
Сайгъылы мусульманлар! Юдже Аллаһ Мелеклерни яратты ве оларгъа къанат берди. Къанатларнынъ сайысы эки, учь, алты ола биле. Эм де ойле Мелеклер бар ки, оларда къанатларнынъ сайысы айтылгъанлардан даа чокътыр. Бу акъкъында Пейгъамбер Мухаммад ʻалейһиссалямнынъ Хадисинде бойле айтыла, манасы: «Джибриль Мелекте 600 къанат бар. Ве о бутюн Мелеклернинъ башлыгъыдыр. Онынъ ачылгъан эки къанаты ерни шаркътан гъарпкъадже къапата.» Ве Микяʼиль Мелекнинъ бир къанаты Джибриль Мелекнинъ алты юз къанатындан даа балабандыр. Эр шейни яраткъан Екяне Яратыджыгъа хамд этемиз ве бу аджайип ве шерефли яратылгъанлар Аллаһнынъ Къудретине исбаттыр. Аллаһ кяинатта не истесе, оны япа.
Мукъаддес Къурʼанда («Фатыр» Суреси, 1 Аетте) бойле айтыла:

﴿ الْحَمْدُ لِلَّهِ فَاطِرِ السَّمَوَاتِ وَالْأَرْضِ جَاعِلِ الْمَلَائِكَةِ رُسُلًا أُولِي أَجْنِحَةٍ مَثْنَى وَثُلَاثَ وَرُبَاعَ يَزِيدُ فِي الْخَلْقِ مَا يَشَاءُ إِنَّ اللَّهَ عَلَى كُلِّ شَيْءٍ قَدِيرٌ ﴾

Манасы: «Кяинатнынъ Раббине Аллаһкъа хамд олсун. Аллаһ Мелеклерни Эльчи япты ве оларгъа экишер, учер ве дёртер къанат багъышлады. Аллаһ яраткъанларыны насыл истесе, ойле буюте. Керчектен де, Аллаһ Къудретлидир».
Шариʻатымызда белли ки, Аллаһ Мелеклерни ойле бир шекильде яратты ки, олар башкъа яраткъанларнынъ къыяфетини ала билелер. Мелеклер эркек къыяфетини алалар, лякин джынсий мучесиз (без половых органов). Хадислернинъ биринде бойле хабер бериле: Джибриль Мелек Пейгъамберимиз Мухаммад ‘алейhиссалям ве Онынъ сахабелери оглеринде эркек къыяфетинде, беяз урбада, къара сачлы пейда олды. Бу Хадиснинъ девамында айтыла ки, Иман – бу Аллаһкъа, Мелеклерге, Китапларгъа, Пейгъамберлерге ве Ахирет кунюне эм де хайыр ве шер такъдир этильгенине инанмакътыр.
Мелеклер, кесинликле, ич бир вакъыт къадын къыяфетини алмайлар. Бу акъкъында мусульман олмагъан инсанлар янълыш фикирде булуналар. Бу динимизге къаршыдыр. Ким Мелеклер къадынлар деп тюшюнсе, имандан чыкъа. Къур`анда («Ан-Наджм» Суреси, 27 Аетте) дениле:

﴿ إِنَّ الَّذِينَ لَا يُؤْمِنُونَ بِالْآَخِرَةِ لَيُسَمُّونَ الْمَلَائِكَةَ تَسْمِيَةَ الْأُنْثَى ﴾

Манасы: «Ким Къыямет кунюне инанмай, Мелеклерге къадын адларыны бере». Эм де Мелеклер къушларнынъ къыяфетлерини ала билелер, амма ич бир вакъыт йылан, копек, домуз ве оларгъа ошагъан къыяфетлерини алмайлар.
Сайгъылы мусульманлар! Билинъиз ки, эписи Мелеклер Аллаһнынъ итаатлы къуллары ве олар эписи мусульманлар. Аллаһ оларны севе, оларгъа шереф багъышлады ве оларны гуняхсыз эвлия япты. Аллаһ Къурʼанда («Ат-Тахрим» Суреси, 6 Аетте) Мелеклерни бойле макътай:

﴿ لَا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ ﴾

Манасы: «Мелеклер гунях этмейлер, Аллаһнынъ бутюн эмирлерини япалар».
Пейгъамберлерден ве Ресуллерден энъ улу олгъан Мухаммад ʻалейһиссалям бойле деди:

مَا فِي السَّمَاءِ مَوْضِعُ أَرْبَعِ أَصَابِعِ إِلَّا وَفِيهِ مَلَكٌ قَائِمٌ أَوْ قَاعِدٌ أَوْ رَاكِعٌ أَوْ سَاجِدٌ

Манасы: «Еди коктен эр бириси Намаз, Къыям, Рукуʻ ве Суджуд къылгъан Мелеклернен толу. Ве олар бу къадар чокъ ки, оларнынъ арасында бир авуч киби бош ер ёкъ». Мелеклер эр вакъыт Аллаһкъа хамд этелер ве итаалы олалар. Ве бойле япмагъа ич бир вакъыт болдурмайлар, бундан безмейлер ве бойле япмакътан ич бир вакъыт быкъмайлар.
Аль-‘Аршнынъ чевресинде олгъан Мелеклернинъ сайысы эписи коклерде булунгъан Мелеклернинъ сайысындан даа чокътыр. Мелеклернинъ умумий сайысы о къадар чокъ ки, эгер Адемден башлап ве Къыямет кунюне къадар олгъан эписи инсанларны ве эписи джиннлерни топласакъ, эп бир Мелеклернинъ сайысы зияде оладжакъ. Мелеклернинъ сайысыны тек Аллаһ биле. Мелеклер, Аллаһ оларны яраткъан вакъыттан берли ольмейлер, олар тек Мелек Исрафиль сургъа уфюрген сонъ оледжеклер, яни Къыямет кунюнде.
Сайгъылы мусульманлар, билинъиз ки, Мелеклер Къурʼанда шерефленгенлер ве оларны сёгмеге эм де акъаретлемеге мумкюн дегиль. Мусульман алимлери бу акъкъында бойле дедилер:

سَابُّ الْمَلَائِكَةِ كَافِرٌ وَ لَوْ سَبَّ وَاحِدًا مِنْهُمْ

Манасы: «Ким бир Мелекни биле сёгсе, о имансыз ола». Аллаһ бизни бундан къорчаласын.
Урьметли дин къардашларым, иблис Мелек дегильдир. Асылында, о атештен яратылгъан джинндир ве эписи джиннлернинъ атасыдыр. Бу акъкъында Къурʻанда «Аль-Кяhф» Суресинде, 50 Аетте айтыла:

﴿ وَإِذْ قُلْنَا لِلْمَلائِكَةِ اسْجُدُوا لآدَمَ فَسَجَدُوا إِلاَّ إِبْلِيسَ كَانَ مِنَ الْجِنِّ فَفَسَقَ عَنْ أَمْرِ رَبِّهِ ﴾

Манасы: «Аллаһ Адамни яраткъан сонъ бутюн Мелеклерге ве джиннлерге оны селямламакъ ичюн седжде япмагъа буюрды. Мелеклер буны яптылар, амма иблис джиннлерден олып, кибирленди ве Адемге седжде япмагъа ред этти». Юдже Аллаһ иблиске бойле деди («Сад» Суресинде, 78 Аетте):

﴿ وَإِنَّ عَلَيْكَ لَعْنَتِي إِلَى يَوْمِ الدِّينِ ﴾

Манасы: «Керчектен де, Мен сени Ахирет кунюне къадар лянетледим». Эгер иблис Мелек олгъан олса, о Аллаһнынъ буюргъаныны япар эди ве имансыз олмаз эди. Базы инсанлар айталар, санки, иблис Мелеклернинъ башлыгъы эди, бу джаиллик ве янълыштыр эм де динимизге къаршыдыр.
Мелеклер ич бир вакъыт инсанларны ярамай шейлерге огретмезлер, чюнки озьлери ярамай шейни япмайлар ве алдатмайлар. Оларгъа ич бир ярамай чизгилер аит дегиль.
Сайгъылы мусульманлар, эр биринъизге хитап этем, бу акъикъатны догъру анъламакъ ве акъикъий итикъат ёлунда къавий турмакъ лязимдир. Бу Аhлюc-Cуннаh уаль-джама‘атнынъ ве улу Пейгъамберимизнинъ эм де такъвалы cаляфитлернинъ итикъатыдыр. Бунен сиз буюк гъалебе къазанырсынъыз. Аллаһым, бизге файдалы илим багъышла ве бу илимни къулланып, хайыргъа етмеге насип эт. Бизге бу дюньяда ве обир дюньяда бахытлы олмагъа насип эйле.

هَذَا وَأَسْتَغْفِرُ اللَّهَ لِي وَلَكُمْ

----------------------------------------------------------------------------------------------------------

إِنَّ الْحَمْدَ لِلَّهِ نَحْمَدهُ وَنَسْتَغْفِرُهُ وَنَسْتَعِينُهُ وَنَسْتَهْدِيهِ وَنَعُوذُ بِاللهِ مِن شُرُورِ أَنفُسِنَا وَمِن سَيِّئَاتِ أَعْمَالِنَا، مَن يَهْدِ اللهُ فَلاَ مُضِلَّ لَهُ وَمَن يُضْلِلْ فَلاَ هَادِيَ لَهُ، والصلاةُ والسلامُ على سيِّدِنا محمد الصادِقِ الوَعْدِ الأَمينِ وعلى إِخْوَانِهِ النبيِّين والمُرسَلين. ورَضِيَ اللهُ عن أُمَّهاتِ المُؤمنين وآلِ البيتِ الطَّاهِرِين وعن الخُلَفَاءِ الرَّاشِدين أبي بكرٍ وعمرَ وعُثْمانَ وعليّ وعن الأَئِمَّةِ المُهْتَدِين أبي حنيفةَ ومالكٍ والشَّافعيِّ وأحمدَ وعن الأولياءِ والصالحين. أمَّا بعدُ عِبَادَ اللهِ فإنِّي أُوصِيكُمْ وَنَفْسِيَ بِتَقْوَى اللهِ العَليِّ الْعَظِيمِ فَاتَّقُوهُ.

واعْلَمُوا أنَّ اللهَ أمَرَكُمْ بِأَمرٍ عظيمٍ، أَمَرَكُم بالصلاةِ والسلامِ على نبيِّهِ الكَريمِ فقال في مُحْكَمِ تَنْزِيلِهِ: ﴿ إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا﴾
اللَّهُمَّ صَلِّ عَلَى سَيِّدِنَا مُحَمَّدٍ وَعَلَى آلِ سَيِّدِنَا مُحَمَّدٍ كَمَا صَلَّيْتَ عَلَى سَيِّدِنَا إِبْرَاهِيمَ وَعَلَى آلِ سَيِّدِنَا إِبْرَاهيمَ وَبَارِكْ على سيّدِنا مُحمدٍ وَعلى آلِ سيِّدِنا مُحمدٍ كما بارَكْتَ على سيِّدِنا إبراهيمَ وعلى آلِ سيدِنا إبراهيمَ في العالَمِينَ إِنَّكَ حَمِيدٌ مَجِيد

اللَّهُمَّ اغْفِرْ لِلْمُؤْمِنِينَ وَالْمُؤْمِنَاتِ الأَحْيَاءِ مِنْهُمْ وَالأَمْوَات