Центральное духовное управление мусульман - Таврический муфтият - Суннетке уймакъ

Суннетке уймакъ

إِنَّ الْحَمْدَ لِلَّهِ نَحْمَدهُ وَنَسْتَغْفِرُهُ وَنَسْتَعِينُهُ وَنَسْتَهْدِيهِ وَنَعُوذُ بِاللهِ مِن شُرُورِ أَنفُسِنَا وَمِن سَيِّئَاتِ أَعْمَالِنَا، مَن يَهْدِ اللهُ فَلاَ مُضِلَّ لَهُ وَمَن يُضْلِلْ فَلاَ هَادِيَ لَهُ، وَأَشْهَدُ أَن لاَ إِلهَ إِلاَّ اللهُ وَحْدَهُ لاَ شَرِيكَ لَهُولا مَثِيلَ له ولا ضِدَّ له ولا نِدَّ له، وَأَشْهَدُ أَنَّ سَيِّدَنَا وحَبِيبَنا وعظيمَنا وقائدَنا وقُرَّةَ أَعْيُنِنا مُحَمَّدًا عَبْدُهُ وَرَسُولُهُ وصَفِيُّهُ وحبيبُهُ صَلَوَاتُ اللهِ وَسَلاَمُهُ عَلَيْهِ وَعَلَى كُلِّ رَسُولٍ أَرْسَلَه. الصلاةُ والسلامُ عليكَ سيِّدي يا رسولَ الله. الصلاةُ والسلامُ عليكَ يا سيِّدي يا صاحِبَ الذِّكرَى يا أبا القاسِم يا أبا الزَّهْراءِ يا محمد.أَمَّا بَعدُ عِبَادَ اللهِ، فإني أُوصِيكُمْ وَنَفْسِيَ بِتَقْوَى اللهِ الْعَلِيِّ الْقَديرِ القائلِ في مُحْكَمِ كتابِه:

﴿ يَاأَيُّهَا الَّذِينَ آمَنُوا اتَّقُوا اللَّهَ وَلْتَنْظُرْ نَفْسٌ مَا قَدَّمَتْ لِغَدٍ وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ﴾

Аллаhкъа хамд олсун, О бизге ярдым ве бизни афу этсин деп, Онъа Ду’а этемиз. Бизни шерден ве яманлыкътан къорчаласын деп, Оны ялварамыз. Кимге Аллаh Акъикъат ёлуны берди, ич кимсе оны бу ёлдан шашыртмаз. Амма кимге Аллаh Акъикъат ёлуны бермеди, ич кимсе оны къорчаламаз. Аллаh къусурсыз, ич бир шейге ве ич кимсеге мухтадж дегиль ве Онъа бенъзеген ич кимсе ёкъ.

Шеhадет этем, Аллаhтан башкъа Иляh ёкъ, Онынъ ортагъы ёкъ ве Мухаммад Аллаhнынъ къулу ве Пейгъамберидир.

Аллаhнынъ къуллары! Такъвалы олмагъа эпинъизни давет этем. Такъвалыкъ – бу фарзларны ерине кетирмек ве гуняхлардан къачынмакътыр.

Юдже Аллаh сонъки Пейгъамберге, Мухаммад ’алейhиссалямгъа Мукъаддес Къур’анны эндирди. Пейгъамберимиз, ’алейhиссалям бойле деген эди:

"لا نَبِيَّ بَعْدِي"

 манасы: «Менден сонъ Пейгъамбер олмайджакъ».

Мукъаддес Къур’анда шойле буюрыла:

﴿إنَّ اللهَ اصْطَفَى ءَادَمَ وَنُوحاً وءَالَ إِبْرَاهِيمَ وءالَ عِمْرانَ عَلَى العَالَمِين﴾

 манасы: «Керчектен де, Аллаh Адемни, Нухны, Ибраhимнинъ ве ‘Имраннынъ сюлялелерни сечти ве оларгъа Пейгъамберлик багъышлады».

Сайгъылы дин къардашларым! Адем Пейгъамберинден башлап, бизим Пейгъамберимизге къадар, келип кечкен бутюн Пейгъамберлер Аллаhнынъ къанунларыны кутьмеге давет эте эдилер. Олар Аллаhтан вахий вастасынен не кельген олса, ич бир шейни гизлемейип, денъиштирмейип, инсанларгъа эписини анълатып бильдиргенлер. Чюнки Аллаhу Та'аля оларгъа Шари‘атны толусынен анълатмагъа эмир этти.

Пейгъамберимиз Мухаммад ’алейhиссалям Ислямгъа даветини тек джума куньлери я да байрамларда дегиль де, о буны омюр бою, яни Пейгъамберлик вазифесини алгъандан берли япа эди. Пейгъамберимиз эм эркеклерге эм де къадынларгъа Ислямны даркъата эди. Оларгъа Ахиретни хатырлатып, такъвалыкъкъа чагъырып, къуртулыш ёлуны косьтере эди.

Ресулюллаhымызнынъ вефатындан эвель вахийлер сонъуна етти ве янъы Шари‘ат тамамланды. Бильгенимиз киби, бизим Пейгъамберимизден сонъра янъы Пейгъамбер кельмейджек ве Пейгъамберимизге берильген Шари'ат денъишмейджек.

Улу Пейгъамберимиз бизим ичюн энъ яхшы орьнектир. Онынъ ваазлары ве насиатлары бизим ёлумызны айдынлата, олар бизге акъыкъатны косьтере ве хайырны япмакъ ичюн реберлик эте. Акъыллы бир инсан бизим Пейгъамберимизнинъ насиатларыны кутип, озюни чешит тюрлю яманлыкътан къорчалар ве онъа зарар кетиреджек шейлерден узакъ турар.

Бу акъкъында ‘Ирбад ибн Сария бойле деди, манасы: «Бир кере Пейгъамберимиз Мухаммад ’алейhиссалям бизге бойле бир ваазнен хитап этти ки, буны эшиткен сонъ бизим юреклеримиз титреди ве козьлеримиз козьяшнен толды. Вааз биткен сонъ биз Пейгъамберге бойле дедик, манасы: «Эй, Аллаhнынъ Ресули! Биз пек эеджанландыкъ, санки бу вааз веда ваазыдыр, сен бизге насиат бер». Пейгъамбер Мухаммад ’алейhиссалям бойле айтты:

"أُوصِيكُم بِتَقْوَى اللهِ عَزَّ وَجَلَّ وَالسَّمْعِ وَالطَّاعَةِ" 
"فَإِنَّهُ مَن يَعِشْ مِنْكُم فَسَيَرَى اخْتِلافاً كَثِيراً فَعَلَيْكُم بِسُنَّتِي وَسُنَّةِ الخُلَفَاءِ الرَّاشِدِينَ المُهْدِيِّينَ مِنْ بَعْدِي عَضُّوا عَلَيْها بِالنَّوَاجِذِ" 

 манасы: «Сизни такъвалы олмагъа давет этем! Аллаhкъа итаатлы олунъыз ве бойсунынъыз! Керчектен де, менден сонъ яшагъанлар чокъ анълашмамазлыкъ кореджеклер, онынъ ичюн меним суннетиме ве менден сонъ акъикъат ёлунен кеткен адиль Халифлернинъ суннетине сым-сыкъ багъланынъыз.»

Пейгъамберимиз ’алейhиссалям онынъ олюминден сонъ оладжакъ базы шейлер акъкъында вахий вастасынен биле эди. О бир шейни анълаткъанда сахабелер къыбырдамайып динълей эдилер, сахабелер ойле сессиз эдилер ки, санки башларында къушлар отура ве оларны уркютмемек ичюн къыбырданмай эдилер. Яни бу къадар Пейгъамбермизнинъ айткъан бир сёзюни къачырмагъа къоркъа эдилер. Ве онынъ ичюн Пейгъамберимизнинъ сёзлери сахабелернинъ гонъюллерине кирип, къальплерини титреттире эдилер. Ве бу джесюр, къоркъусыз инсанларнынъ козьлери козьяшнен тола эди. Сахабелер анълай эдилер Пейгъамберимизнинъ сёзлери ве берген насиатлары олар ичюн файдалы олып, Ахиретте къуртулыш ёлуны косьтере эди.

Сахабелер Пейгъамберимизнинъ насиатларынынъ эмиетини билип, онъа сесленип: ''Йа Ресулюллаh бизлерге насиат этип огют бер'' деп риджа эткенлер. Ве джевап оларакъ насыл бир насиат Пейгъамберимиз берген эди? О, оларны такъвалы олмагъа чагъырды! Ве такъвалыкъ недир, сайгъылы джемаат? Эльбетте, такъвалыкъ тек имам киби корюнмек, яни джюббе, чалма киймек ве сакъал ташымакънен битмей. Языкъ ки, заманымызда чокъ инсанлар бар ки, динимизни къулланып, башларына дюльбер чалма, устюне джюббе киелер, лякин бу урбаларнен керчек юзьлерини гизлейлер. Сайгъылы мусульманлар! Шуны унутмайыкъ, такъвалыкъ – бу фарзларны ерине кетирмек ве харамдан сакъынмакътыр эм де Аллаhнынъ эмирлерини кутькенде илимнинъ ве самимиетнинъ эмиети чокъ буюк. Такъвалы олмакънынъ ёлу будыр.

Такъвалыкъ даветинден сонъ Пейгъамберимиз Мухаммад, ’алейhиссалям огюнде тургъан сахабелерге Аллаhкъа олгъан итааткъа эсасланып, къавий бир топлулыкъ къурмагъа буюрды. Чюнки анълашылмамазлыкъ, дагъыныкълыкъ ве парчалув – зайыфлыкъкъа себеп ола ве бизни имаесиз къалдыра.

Къуртулышымыз исе, Пейгъамберимизнинъ мирасыны бизге кетирген ве огреткен инсанларнынъ сёзлерини динълев ве Пейгъамбер Мухаммад ’алейhиссалям бизге огреткени киби Аллаhкъа итаат этювиндедир. Бу бизим джемиетимизни зевалдан къорчалар.

Пейгъамберимиз ’алейhиссалям бизни айырылмамамызны, джемиетимиз болюнмесин ве дагъылып кетмесин деп тенбиледи. О деди:

فَإِنَّهُ مَن يَعِشْ مِنْكُم فَسَيَرَى اخْتِلافاً كَثِيراً

 «Керчектен де, менден сонъ яшагъанлар чокъ анълашмамазлыкъ кореджеклер». Келеджек акъкъында бу бильгилер Пейгъамберимизге Аллаhтан вахий оларакъ берильген.

Керчектен де, онынъ уммети етмиш учь группагъа болюнир ве бир группадан гъайры, къалгъан етмиш экиси джеhеннемге тюшеджеклер. Къуртулгъанлар исе – бу Пейгъамберимизнинъ ве онынъ сахабелернинъ ёлунен кеткенлердир.

Пейгъамберимиз ’алейhиссалям бизге Дженнетке киреджек группада ичюн бойле насиат берди:

فَعَلَيْكُم بِسُنَّتِي وَسُنَّةِ الخُلَفَاءِ الرَّاشِدِينَ المُهْدِيِّينَ مِنْ بَعْدِي عَضُّوا عَلَيْها بِالنَّوَاجِذِ 

манасы: «Меним суннетиме ве менден сонъ акъикъат ёлунен кеткен адиль Халифлернинъ суннетине сым-сыкъ багъланынъыз.» Чюнки Пейгъамберимизге айырылув ве болюнюв оладжагъы акъкъында вахий вастасынен бильдирильди.

Ойле инсанлар бар ки, олар Пейгъамберимизни севмейлер. Олар Пейгъамберимиз акъкъында бойле айталар: «О къабирде яткъан джесет бизге насыл бир файда кетирер.» Аллаh бизни бойле ве бунъа ошагъан чиркин шейлерден сакъласын.

Бойле инсанларнынъ юреклери къаба ве къапалы, олар мусульманларгъа урьмет косьтермейлер. Бир мусульман вефат этип, къабиринде олса биле, биз онъа сайгъы ве урьмет косьтермек керекмиз. Олар исе вефат эткен мусульманларгъа Къур'ан окъумагъа, ду'а кечирмеге ясакъ этелер. Севгили Пейгъамберимизнинъ къабири янында олмагъа ве анда берекетленмеге де ясакъ этелер. Лякин Пейгъамберимиз айткъан: ''Меним къабирими зиярет эткенине Ахирет Кунюнде шефаатым оладжакъ''.

Бойле инсанлар Пейгъамбер Мухаммад ’алейhиссалямнынъ суннетине уймайлар ве адиль Халифлернинъ акъикъий ёлунен кетмейлер.

Сайгъылы мусульманлар! Керчектен де, биз дос-догъру Пейгъамберимизнинъ ве онынъ такъвалы сахабелернинъ ёлундан кетсек, къуртулырмыз.

Аллаhу Та'аля бизге Пейгъамберимизнинъ ёлунен кетмеге кучь-къувет берсин. Бизим диний бильгилеримизни арттырсын ве Пейгъамберимиз Мухаммадны ’алейhиссалям эм де башкъа бутюн Пейгъамберлерни даа чокъ севмеге насип этсин. Аллаh иманымызны къавийлештирсин ве бу дюньяны мусульман олып, терк этмеге багъышласын деп Онъа Дуʻа этемиз.

هَذَا وَأَسْتَغْفِرُ اللَّهَ لِي وَلَكُمْ

-------------------------------------------------------------------------

إِنَّ الْحَمْدَ لِلَّهِ نَحْمَدهُ وَنَسْتَغْفِرُهُ وَنَسْتَعِينُهُ وَنَسْتَهْدِيهِ وَنَعُوذُ بِاللهِ مِن شُرُورِ أَنفُسِنَا وَمِن سَيِّئَاتِ أَعْمَالِنَا، مَن يَهْدِ اللهُ فَلاَ مُضِلَّ لَهُ وَمَن يُضْلِلْ فَلاَ هَادِيَ لَهُ، والصلاةُ والسلامُ على سيِّدِنا محمد الصادِقِ الوَعْدِ الأَمينِ وعلى إِخْوَانِهِ النبيِّين والمُرسَلين. ورَضِيَ اللهُ عن أُمَّهاتِ المُؤمنين وآلِ البيتِ الطَّاهِرِين وعن الخُلَفَاءِ الرَّاشِدين أبي بكرٍ وعمرَ وعُثْمانَ وعليّ وعن الأَئِمَّةِ المُهْتَدِين أبي حنيفةَ ومالكٍ والشَّافعيِّ وأحمدَ وعن الأولياءِ والصالحين. أمَّا بعدُ عِبَادَ اللهِ فإنِّي أُوصِيكُمْ وَنَفْسِيَ بِتَقْوَى اللهِ العَليِّ الْعَظِيمِ فَاتَّقُوهُ.

واعْلَمُوا أنَّ اللهَ أمَرَكُمْ بِأَمرٍ عظيمٍ، أَمَرَكُم بالصلاةِ والسلامِ على نبيِّهِ الكَريمِ فقال في مُحْكَمِ تَنْزِيلِهِ: ﴿ إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا﴾
اللَّهُمَّ صَلِّ عَلَى سَيِّدِنَا مُحَمَّدٍ وَعَلَى آلِ سَيِّدِنَا مُحَمَّدٍ كَمَا صَلَّيْتَ عَلَى سَيِّدِنَا إِبْرَاهِيمَ وَعَلَى آلِ سَيِّدِنَا إِبْرَاهيمَ وَبَارِكْ على سيّدِنا مُحمدٍ وَعلى آلِ سيِّدِنا مُحمدٍ كما بارَكْتَ على سيِّدِنا إبراهيمَ وعلى آلِ سيدِنا إبراهيمَ في العالَمِينَ إِنَّكَ حَمِيدٌ مَجِيد

اللَّهُمَّ اغْفِرْ لِلْمُؤْمِنِينَ وَالْمُؤْمِنَاتِ الأَحْيَاءِ مِنْهُمْ وَالأَمْوَات