Центральное духовное управление мусульман - Таврический муфтият - Мухьаммад Пейгъамберимизни муджизелер. Аль-Исра` ве Аль-Ми‘радж

Мухьаммад Пейгъамберимизни муджизелер. Аль-Исра` ве Аль-Ми‘радж

Аль-Исра`

الْحَمْدُ للهِ رَبِّ الْعَالَمِينَ وَالصَّلاَةُ وَالسَّلاَمُ عَلَى نَبِيِّهِ الْكَرِيمِ وَعَلَى ءَالِهِ وَأَصْحَابِهِ الطَّيِّبِينَ الطَّاهِرِينَ، عِبَادَ اللهِ أُوصِيكُمْ وَنَفْسِيَ بِتَقْوَى اللهِ الْعَظِيمِ
قال الله تعالى في القرآن الكريم ﴿قُل هُوَ الله أَحَد

Бу дюньяны Озь Къудретинен яраткъан, бизлерге джан ве рызыкъ берген, сынъырсыз, мекянсыз, къусурсыз олгъан Аллаhу Та'алягъа хамд-у сеналар олсун! Аллаhнынъ энъ севимли къулы, имамларнынъ имамы, Пейгъамберимиз Мухаммад Мустафагъа салят-у селямлар олсун!

Озюме ве сизге насиат этем – Аллаhтанъ къоркъунъыз, Онынъ эмреткенлерини япып харамдан къачынынъыз!

Къыйметли дин къардашларым! Бильгенимиз киби, Аллаhу Та'аля догърулыкъларнынъ исбаты оларакъ Ресуллерге муджизе багъышлады. Ве хакъикъаттенъ энъ буюк ве аджайып муджизелер Пейгъамберимизде эди. Оларнынъ арасында «Аль-Исра'» адлы муджезевий гедже сефери ве «Аль-Ми'радж» адландырылан Пейгъамберимизнинъ коклерге юкселювидир. Бу эки хадисе Раджаб айнынъ 27джи геджесинде пейда олды.

Аль-Исра' сефери хакъкъында Къур'ан-и Керимде ''Аль-Исра' '' суресинъде шойле буюрыла:

سُبْحَانَ الَّذِي أَسْرَى بِعَبْدِهِ لَيْلًا مِنَ الْمَسْجِدِ الْحَرَامِ إِلَى الْمَسْجِدِ الْأَقْصَى الَّذِي بَارَكْنَا حَوْلَهُ لِنُرِيَهُ مِنْ آَيَاتِنَا إِنَّهُ هُوَ السَّمِيعُ الْبَصِيرُ

Манасы: "Озь къулына аляметлерини косьтермек ичюн муджезевий бир шекильде "Аль-Харам"(Меккеде булуна) джамисинден "Аль-Акъса" (Къудусте булуна) джамисине авушмагъа насиб эткен Аллаhкъа Хамд олсун. Хакъикъаттен Аллаh эр шейни корьген ве эшиткендир".

Сайгъылы мусульманлар! Къур ʾанда («Аль-Исра» Суреси, 1 Аети) бойле буюрыла:

Манасы: «Гедже уяныкъ алда олгъанда, бедени ве рухунен Меккеден Месджид Аль-Харамдан Месджид Аль-Акъсагъа Исра (гедже елджулыкъны) этти. Бу, Аллаh ичюн къыйын дегильдир, чюнки О Къадирдир.» Джибриль ʾалейhиссалям Пейгъамберимизнен берабер Месджид Аль-Харамдан Буракънынъ устюне минип, Месджид Аль-Акъсагъа ёл алдылар. Аль-Исра – бу керчектир, бу акъкъында Къурʾанда буюрыла ве бутюн мусульман алимлери бирликте буны тасдикъладылар. Эгер бириси бунъа къаршы чыкъса, Къурʾанны ред эте.

Биз, мытлакъа, билемиз, Аллаh эр шейнинъ Яратыджысы. Аллаh ич бир шейге ве ич бир кимсеге мухтадж дегильдир. О башлангъычсыз ве сонъсуздыр.

Аль-Байhакъий ривает эткен Хадисте бойле айтыла: «Пейгъамберимиз Мухаммад, саллялаhу алейhи ве селлем сахабелернен берабер Меккеде ятсы намаз къыла эдилер, оларнынъ янына Джибриль ʾалейhиссалям кельди ве онынъ янында Буракъ (Дженнеттен айван) бар эди. Бу айван башкъа айванлардан фаркълаша эди о мулдан уфакъ эшектен буюк эди. Джибриль манъа деди: «Онынъ устюне мин.» Буракънынъ устюне минип, Меккеден Мединеге, сонъра Тур Синагъа (бу ерде Муса ʾалейhиссалям, арифсиз, сессиз ве яраткъанларнынъ нутугъына ошамагъан Аллаhнынъ Келямыны эшитти), даа сонъра Иса ʾалейиссалямнынъ догъгъан ерге, яни Бейти Лехмге кетти. Бойле эр ерде булунып, Пейгъамберимиз Мухаммад, саллялаhу алейhи ве саллям намаз къылды.

Ондан сонъра Пейгъамбер Эфендимиз Джибрильнен бирликте Иерусалимге кирип, Месджид Аль-Акъсагъа кельдилер. Онынъ янында Пейгъамбер Мухаммад, саллялаhу алейhи ве саллям айваныны байлап, Месджид Аль-Акъсагъа кирип, чокъ намаз къылды.

Пейгъамберимиз Исра геджесинде корьген меракълы олайлардан базылары:

Биринджи куню экип, экинджи куню берекетни джыйгъан инсанларны корьди. Джибриль онъа деди: «Булар Аллаh елунда джиhат эткенлердир.» Пейгъамберимиз бу дюньяны бир къарт шекильде олгъаныны корьди.

Даа сонъра Пейгъамбер Эфендимиз фараоннынъ къызыны сачларыны тарагъан, мусульман салих бир къадыннынъ мезарындан чыкъкъан, гузель бир къокъусы дуйды. Пейгъамбер Мухаммад бир богъанынъ тар бир тешиктен чыкъкъан, сонъра текрар къайтмагъа истеген, факъат о тешикке къайтмагъа кучю етмегенини корьди. Джибриль деди: «Бу, инсанларгъа зарары ве фитнени чыкъаргъан бозукъ сезлерини сейлгенлердир».

Пейгъамбер Эфендимиз бир миллетнинъ бакъырдан олгъан тырнакъларнен юзьлерини ве кокюслерини тырнагъанларыны корьди, Джибриль онъа айтты: «Булар, гъыйбет эткенлер».

Аллаhнынъ Ресулю даа сонъ атешли макъасларнен тиль ве дудакъларны кесильгенлерни корьгенде, Джибриль деди: «Булар инсанларны ярамай олгъан шейлерге, фитнеге, делялете, алдатмагъа ве хиянетке давет эткенлердир».

Пейгъамбер Мухаммад башлары къырылып, текрар эски алгъа кельген инсанларны корьгенде Джибриль онъа деди: «Булар намазны къылмагъанлардыр. Ирин ичкен инсанларны корьди, олар бу дюньяда ички ичкен инсанлардыр.»

Пейгъамбер Мухаммад чыплакъ юрьген ве шашмалагъан адамларыны корьди, оларда тек аврет ерлери къапалы эди. Пейгъамберимиз Джибрильден: «Бу ким?», деп сорады. Джибриль деди: «Бу зекят бермегенлердир.»

Пейгъамбер Мухаммад ʾалейhиссалям ялынъыз тургъан иблисни (шейтан) корьди. О Пейгъамберге кедер этмеге тырыша эди, амма Пейгъамберлер шейтаннынъ весвесесинден къорчалангъанлар. Пейгъамбер Мухаммад ʾалейhиссалям бозукъ ве сасыгъан эт артындан чапкъалагъан инсанларны корьди. Бу не олгъаныны Джибрильден сорады. Джибриль исе олар элялны къалдырып, харамны ве зинаны япкъанлардыр.

Пейгъамберимизнинъ геджеде япылгъан аджайип сефери – бу буюк муджизедир. Пейгъамбер Мухаммад ‘алейhиссалям Иерусалим шеэринде Аль-Акъса джамисинде булунып, бутюн Пейгъамберлер ве Ресуллернен берабер джемаатнен имам олып, намаз къылды. Аллаh Пейгъамберимизге бойле буюк хайыр багъышлады, яни бутюн Пейгъамберлерге имам олып, Намаз къылдырмакъ.

Аль-Ми‘радж

الْحَمْدُ للهِ رَبِّ الْعَالَمِينَ وَالصَّلاَةُ وَالسَّلاَمُ عَلَى نَبِيِّهِ الْكَرِيمِ وَعَلَى ءَالِهِ وَأَصْحَابِهِ الطَّيِّبِينَ الطَّاهِرِينَ، عِبَادَ اللهِ أُوصِيكُمْ وَنَفْسِيَ بِتَقْوَى اللهِ الْعَظِيمِ

Аль-Ми‘радж акъкъында Пейгъамбер Мухаммад ʾалейhиссалямнынъ Хадисинде ве Къур`анда айтыла. Манасы: «Пейгъамберимиз Джибрильни, онынъ керчек суретинде, экинджи кере корьди.» «Биз намаз къылдыкъ ве ондан сонъ биринджи кокке котерильдик. Къапы янында бизни токътаттылар ве «Сиз кимсинъиз?», деп сорадылар. Джибриль деди: «Бу мен ве Мухаммад.» Бекчи сорады: «Кокке котерильмек ичюн о рухсет алдымы?» Джибриль деди: «Эбет».

Къапылар ачылды ве биринджи кокте биз Адамнен корюштик, экинджи кокте – 'Иса ве Яхья Пейгъамберлернен, учюнджи – Юсуфнен, дертюнджи – Идриснен, бешинджи – hаруннен, алтынджы – Мусанен, единджи кокте исе Ибраhимнен корюштик. Пейгъамберимиз Кябеге ошагъан Аль-бейт Аль-Мамур бинаны корьди. Онынъ этрафында чокъ Мелеклерни корьди, олар анда кирип, ибадетни къылып чыкъалар. Ондан сонъ Дженнет терегини корьди (Сидрат аль-Мунтаhа). Онынъ дюльберлигини ич бири анълатып оламай. Бу ерде Пейгъамберимизге бир куньде 50 кере намаз къылмакъ эмир этильди. Пейгъамберимиз инсанларгъа къыйын олмасын деп, намазнынъ сайысыны азлаштырмакъ ичюн Аллаhкъа ялварды, ондан сонъ намазнынъ с айысы куньде 5 кереге тюшюрильди. Куньде беш намазыны къылгъан адам 50 намазнынъ савабыны ала. Бундан гъайры Пейгъамберимизге даа бойле вахий кельди: «Эгер адам бир хайыр япмагъа ниетленсе, бир савап къазана, амма эгер ниетленген хайырны япса, 10 савап къазана. Амма бир ярамайлыкъны япмагъа ниетленсе ве этмеге башласа, бир гунях языла.»

Урьметли дин къардашлар! Аллаh бир ерде я да бир тарафта булунгъаныны тюшюнмеге мумкюн дегиль, чюнки Аллаh ич бир мекянгъа ве тарафкъа мухтадж дегиль. Ким Пейгъамбер Мухаммад ‘алейhиссалям единджи коктен сонъ санки Аллаhнен корюшмек бир ерге котерильгенини тюшюнсе, бу инсан мусульман дегильдир. Онъа Шеhадет келимени айтып, Ислямны янъыдан къабул этмек керек, чюнки Аллаh мекянсыз бардыр.

Пейгъамбер Мухаммаднынъ Ми‘раджда корьген базы шейлер:

  1. Джеhэннемни къоругъан Малик Мелекни корьди.
  2. Дженнетни ве онынъ гузеллигини корьди.
  3. Яратылгъанлардан энъ буюк олгъан Аль-‘Аршны корьди.
  4. Аль-бей т Аль-ма‘мур бинаны корьди.
  5. Сидрат аль-Мунтаhа Дженнет терегини корьди.
  6. Ич бир шейге ошамагъан арифсиз, теляффузсиз эбедий олгъан Аллаhнынъ Келямыны эшитти.
  7. Пейгъамбер Мухаммад юрек иле мекянгъа ве шекильге мухтадж олмагъан Аллаhны корьди.

Бу мубарек геджеде намаз къылмакъ, Къурʾан окъумакъ, дин дерслерини кечирмек, олюлеримизни анъмакъ пек буюк саваптыр. Аллаh бизим гуняхларымызны 'афу этсин, иманымызны къорусын ве хайыр амеллеримизни къабул этсин.

Я Раббиль 'Алямин гуняхларымызны аф этип бизлерге Севгили Пейгъамберимизнен берабер Дженнетте олмагъа насип эйле!!!

قال الله تعالى ﴿إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا﴾

اللَّهُمَّ صَلِّ عَلَى سَيِّدِنَا مُحَمَّدٍ وَعَلَى آلِ سَيِّدِنَا مُحَمَّدٍ كَمَا صَلَّيْتَ عَلَى سَيِّدِنَا إِبْرَاهِيمَ وَعَلَى آلِ سَيِّدِنَا إِبْرَاهيمَ وَبَارِكْ على سيّدِنا مُحمدٍ وَعلى آلِ سيِّدِنا مُحمدٍ كما بارَكْتَ على سيِّدِنا إبراهيمَ وعلى آلِ سيدِنا إبراهيمَ في العالَمِينَ إِنَّكَ حَمِيدٌ مَجِيد

اللَّهُمَّ اغْفِرْ لِلْمُؤْمِنِينَ وَالْمُؤْمِنَاتِ الأَحْيَاءِ مِنْهُمْ وَالأَمْوَات