Центральное духовное управление мусульман - Таврический муфтият - Ша‘бан айнынъ орта геджеси

Ша‘бан айнынъ орта геджеси

إِنَّ الْحَمْدَ لِلَّهِ نَحْمَدهُ وَنَسْتَغْفِرُهُ وَنَسْتَعِينُهُ وَنَسْتَهْدِيهِ وَنَعُوذُ بِاللهِ مِن شُرُورِ أَنفُسِنَا وَمِن سَيِّئَاتِ أَعْمَالِنَا، مَن يَهْدِ اللهُ فَلاَ مُضِلَّ لَهُ وَمَن يُضْلِلْ فَلاَ هَادِيَ لَهُ، وَأَشْهَدُ أَن لاَ إِلهَ إِلاَّ اللهُ وَحْدَهُ لاَ شَرِيكَ لَهُ، وَأَشْهَدُ أَنَّ سَيِّدَنَا مُحَمَّدًا عَبْدُهُ وَرَسُولُهُ صَلَوَاتُ اللهِ وَسَلاَمُهُ عَلَيْهِ وَعَلَى كُلِّ رَسُولٍ أَرْسَلَه.

أَمَّا بَعد عِبَادَ اللهِ، أُوصِيكُمْ وَنَفْسِي بِتَقْوَى اللهِ الْعَلِيِّ الْعَظِيمِ

Аллаhкъа хамд олсун, О бизге ярдым ве бизни афу этсин деп, Ду’а япамыз. Бизни шерден ве яманлыкътан къорчаласын деп, Онъа ялварамыз. Кимге Аллаh Акъикъий елуны берди, ич кимсе оны бу елдан айырмаз. Амма кимге Аллаh Акъикъий елуны бермеди, ич кимсе оны къорчаламаз. Аллаh къусурсыз, ич бир шейге ве ич бир кимсеге мухтадж дегиль эм де Онъа бенъзеген ёкъ. Аллаh мекянгъа ве вакъыткъа мухтадж дегиль.

Шеhадет этем, Аллаhтан башкъа Иляh ккъ, Онынъ ортагъы ёкъ ве шеhадет этемки Мухаммад Аллаhнынъ къулу ве Пейгъамберидир. Ресуллерден ве Пейгъамберлерден энъ улу ве шерефли олгъан Мухаммад ‘аляйhиссалям ‘Абдуллаhнынъ огълуна салят ве селям олсун. Ве бутюн онунъ несилине ве сахабелерине де селямлар олсун. Эм де башкъа бутюн Пейгъамберлерге салят ве селям олсун.

Аллаhнынъ къуллары! Эпинъизни такъвалы олмагъа давет этем. Такъвалыкъ – бу фарзларны япмакъ ве гуняхлардан къачынмакътыр.

Юдже Аллаh буюрды ки, такъвалы мусульман Аллаhнынъ эмирлерини ерине кетиргенини хатырлайджакъ ве гуняхтан чекингенини биледжек. Эм де Къур’анда(«Ан-Ниса`» Сура, 78 Аяти) буюрыла:

أَيْنَمَا تَكُونُواْ يُدْرِككُّمُ الْمَوْتُ وَلَوْ كُنتُمْ فِي بُرُوجٍ مُّشَيَّدَةٍ وَإِن تُصِبْهُمْ حَسَنَةٌ يَقُولُواْ هَذِهِ مِنْ عِندِ اللهِ وَإِن تُصِبْهُمْ سَيِّئَةٌ يَقُولُواْ هَذِهِ مِنْ عِندِكَ قُلْ كُلًّ مِّنْ عِندِ اللهِ فَمَالِ هَؤُلاء الْقَوْمِ لاَ يَكَادُونَ يَفْقَهُونَ حَدِيثًا

манасы: «Къайда олсанъыз олунъ, кенеде олюм сизге етишир; юксек ве сагълам къалелерде олсанъыз биле. Оларгъа бир яхшылыкъ токъунса, бу Аллаhтан дерлер. Эгер башларына бир ямайлыкъ кельсе, бу озюнден дерлер. Айт: эр шей Аллаhтандыр. Бу адамларгъа не олгъан ки, оларагъа айтылгъан созлери зар-зорнен агънаполалар».

Яшадыгъымыз ай Мубарек Ша‘бан айыдыр, ве бу ай бизге Рамаданнынъ якъынлашкъаныны бильдире. Эпимиз билемиз ки Ша`бан айынынъ ортасындаки гедже февкъуляде ве мубарек бир геджедир. Бу гедже акъкъында Пейгъамберимиз Мухаммад ’алейhиссалям Хадисте шойле буюрды:

إِذَا كَانَتْ لَيْلَةُ النِّصْفِ مِنْ شَعْبَانَ فَقُومُواْ لَيْلَهَا وَصُومُواْ نَهَارَهَا

манасы: «Ша‘бан айнынъ ортасы кельсе, о гедже намаз къылынъыз ве куньдюз ораза тутунъыз». 

Бир башкъа Хадисинде де Пейгъамберимиз ’алейhиссалям бойле буюргъанеди:

أَفْضَلُ الصَّلاَةِ بَعْدَ الفَرِيضَةِ صَلاَةُ اللَّيْل

манасы: «Фарздан сонъра энъ фазилетли намаз – гедже намазыдыр».

Гедже намазы – ятсы намаздан сонъ япылгъан суннет намаздыр. Пейгъамберимизнинъ Хадислеринден анълаймыз ки кимде намаз борджу екъса о гедже суннет намазларыны къылып пек буюк савап къазаныр Иншаллаh, кимде намаз борджу бар исе эльбетте баштатын къаза намазларыны эда эте.

Мукъаддерлик акътыр – бу Аллаhнынъ Сыфаты, Аллаhнынъ Сыфатларына исе яманлыкъ аит дегиль. Алемде эр шей Аллаhнынъ Ирадеси иле ола – инсанларнен не багълы олса: эйилик я да яманлыкъ, хасталыкъ я да сагълыкъ, фукъарелик ве зенгинлик. Эр шей Аллаhнынъ истегинен, Онынъ Эбедий Ирадесинен ве Мукъаддеринен лябит. Бу ерде эркезге атырлатмагъа истейим Аллаhнынъ Ирадеси денъишмей сайгъылы джемаат. Не япылгъан Ду‘а, не берильген садакъа неде бир башкъа хайырлы амель инсанынъ къадерни денъиштирмей.

Пейгъамбер Мухаммад ‘алейhиссалям озь къызларына бойле ибарени огрете эди:

مَا شَاءَ اللهُ كَانَ وَمَا لَمْ يَشَأْ لَمْ يَكُنْ

манасы: «Аллаh не истеди олды, не истемеди олмады».

Базы инсанлар айталар санки, Ша‘бан айнынъ орта геджесинде Аллаhкеледжек йылда оладжакъ шейлерни Мелеклерге бильдире, бу догъру дегильдир. Бойле тюшюнмеге янълыштыр. Асылында, бойле шейлер Къадыр геджесинде ола. Ондан гъайры базы адамлар айталар: «Аллаhым, рызкъым аз олса, чокълаштыр я да манъа ярамайлыкъ оладжакъ олса, денъиштир.» Бойле Ду‘аларын япылмасы догъру дегильдир сайгъылы мусульманлар, чюнки аз эввель айткъаным киби Аллаhнынъ Ирадеси ве Такъдири денъишмей. 

Имам Шафи’ийге къадер акъкъында суаль берильгенде о бойле джевап берди, манасы: «Аллаhым, Сен не истединъ о олды, мен буны истемеген олсам биле.Мен не истесем истейим , эгер бунъа Сенинъ Такъдирин олмаса истегим ич бир вакъыт керчеклешмез. Къулларыны Эбедий Бильгилеринле яраттынъ, ве эм яшнен эм къартнен Сенинъ бильгинен Сен не истесенъ о ола. Бирисине иман багъышлайсынъ, обюрюне иманы бермейсинъ. Бирисине Шариаты кутьмеге ярдым этесинъ, обюрюне этмейсинъ. Базы инсанлар бахтлы олалар, базылары бахтсыз. Бирилери чиркин олалар, башкъалары пек дюльбер.» Имам Шафи’ийден имам Аль-Байhакъый ривает этти.

Эгер Аллаh такъдирни денъиштирсе эди, биринджиден Аллаh севимли Пейгъамбер Мухаммад ‘аляйhиссалям ичюн япар эди, амма Аллаhын такъдиринъ денъишмеси имкянсыздыр ве абсюрдтюр. Пейгъамберимиз Мухаммад ‘аляйhиссалям бунынъ акъкъында бойле деди: «Мухаммад Пейгъамбер ‘аляйhиссалям Аллаhтан учь шей истеди, амма Аллаh тек истегини керчеклештирди, къалгъан эки истеги къабул этмеди». Эм де Пейгъамбер Мухаммад ‘аляйhиссалям деди: «Аллаh бойле буюрды, манасы «Эй, Мухаммад эгер бир шей мукъаддер олгъан исе, бу денъишмез».

Бунын ичун ким намазларын, дуаларын вея башкъа ибадетлерин Аллаh тарафындан къабул кормесини истесе биринджиден бу амеллерин Шариатымызда насыл япылмасы керек олгъаныны Динимизни бильген инсанлардан огренсин.

Сайгъылы джемаат! Ша‘бан айнынъ геджеси – бу мубарек геджедир. Ибадетлеримизни догъру япмакъ, Ясин шерифни окъумакъ, олюлерни анъмакъ, Ду‘а окъумакъ, тёвбе этмек башкъа вакъытларына коре даа севаплыдыр.

Къур’анда («Ад-Духан» Суреси, 4 Аети) буюрыла:

فِيهَا يُفْرَقُ كُلُّ أَمْرٍ حَكِيمٍ 

 манасы: «Бу мубарек Къадр геджесинде Аллаh базы Мелеклерге келеджек йылда оладжакъ базы шейлер акъкъында хабер эте».

Къур‘анны тавсир эткен алимлер бу Аеттте Ша‘бан геджеси дегиль де Къадр геджеси акъкъында айтыла деп ачыкъладылар. Амма базылары янълышып, бу Аетни Ша‘бан геджесине аит олгъаныны айталар.

Бу мубарек геджеде Аллаh бизге чокъча ибадетлерни япмагъа кучь-къувет берсин, япкъан хайыр амеллеримизни къабул этип, бизге Дженнетни багъышласын.