Центральное духовное управление мусульман - Таврический муфтият - Имансызлыкънынъ чешитлери

Имансызлыкънынъ чешитлери

إِنَّ الْحَمْدَ لِلَّهِ نَحْمَدهُ وَنَسْتَغْفِرُهُ وَنَسْتَعِينُهُ وَنَسْتَهْدِيهِ وَنَعُوذُ بِاللهِ مِن شُرُورِ أَنفُسِنَا وَمِن سَيِّئَاتِ أَعْمَالِنَا، مَن يَهْدِ اللهُ فَلاَ مُضِلَّ لَهُ وَمَن يُضْلِلْ فَلاَ هَادِيَ لَهُ، وَأَشْهَدُ أَن لاَ إِلهَ إِلاَّ اللهُ وَحْدَهُ لاَ شَرِيكَ لَهُ ولا مَثِيلَ له ولا ضِدَّ له ولا نِدَّ له، وَأَشْهَدُ أَنَّ سَيِّدَنَا وحَبِيبَنا وعظيمَنا وقائدَنا وقُرَّةَ أَعْيُنِنا مُحَمَّدًا عَبْدُهُ وَرَسُولُهُ وصَفِيُّهُ وحبيبُهُ صَلَوَاتُ اللهِ وَسَلاَمُهُ عَلَيْهِ وَعَلَى كُلِّ رَسُولٍ أَرْسَلَه. الصلاةُ والسلامُ عليكَ سيِّدي يا رسولَ الله. الصلاةُ والسلامُ عليكَ يا سيِّدي يا صاحِبَ الذِّكرَى يا أبا القاسِم يا أبا الزَّهْراءِ يا محمد. أَمَّا بَعدُ عِبَادَ اللهِ، فإني أُوصِيكُمْ وَنَفْسِيَ بِتَقْوَى اللهِ الْعَلِيِّ الْقَديرِ القائلِ في مُحْكَمِ كتابِه:

﴿ يَاأَيُّهَا الَّذِينَ آمَنُوا اتَّقُوا اللَّهَ وَلْتَنْظُرْ نَفْسٌ مَا قَدَّمَتْ لِغَدٍ وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ﴾

   Юдже Аллаhкъа хамд олсун! Онъа тенъ ве ошагъан ич бир шей ёкъ. Аллаh кяинатны ич бирисининъ ярдымынен яратты. Эбедий Яратыджыгъа хамд олсун, О къусурсыз, сынъырсыз, акъылнен тасавур этильмеген, тараф ве мекян яратылмаздан эвель бар эди. Аллаhкъа ич бир шей ошамай, О эр шейни эшите ве коре.

Ресуллерден ве Пейгъамберлерден энъ улу олгъан Мухаммад ‘алейhиссалям ‘Абдуллаhнынъ огълуна салят ве селям олсун. Ве эписи онынъ несилине ве сахабелерине де селямлар олсун.

Екяне Яратыджыгъа такъвалы ве итаатлы олмагъа эр кесни давет этем. Эр вакъыт Шари‘атны кутьмек ве Ахирет кунюне азырланмакъ керек. Шу куню акъикъий итикъады олмагъан инсанларгъа мал, пара ве балалары ярдым этип оламазлар. Эр биримиз озюни ве сойларыны джеhэннем атешинден къорчаламакъ ичюн, Аллаh эмир эткенлерини бильмек керекмиз.

         Урьметли мусульманлар! Эр ерде ве эр вакъыт такъвалы олмагъа сизни чагъырам. Сайгъылы мусульманлар! Биз Шариʻатта мумкюн олгъан шейлерни алгъышлаймыз ве ясакъ этильген шейлерни ред этемиз. Ким эбедий Дженнетте олмагъа истесе, Шариʻатны кутьсин, Пейгъамбер Мухаммаднынъ уммети япкъан чокъусы шейлерге уйсын.

         Мусульман олгъанымызгъа шукюрлер олсун. Ислям бу акъикъий ве Аллаhтан кельген екяне диндир. Аллаh Ислям динини озь къулларына эр вакъыт ве эр ерде ольмегендже кутьмеге эмир этти. Бу буюк гъалебе ве бахыттыр. Биз ичюн бу дюньядан Ахиретте тек иман къыйметли байлыкътыр.

         Озюни контроль эт ве озюне эсабат бер, айткъан сёзлерине, япкъан ишлерине ве итикъадына дикъкъатлы ол.

         Мукъаддес Къурʼанда («Ат-Таубаh» Суреси, 74 Аетте) айтыла:

يَحْلِفُونَ بِاللَّهِ مَا قَالُوا وَلَقَدْ قَالُوا كَلِمَةَ الْكُفْرِ وَكَفَرُوا بَعْدَ إِسْلَامِهِمْ

Манасы: «Мунафыкълар Пейгъамбер янында бир шей айтмагъанларына Аллаhнынъ адынен эмин этелер, албуки олар динден чыкъаргъан сёзни эльбетте сёйледилер. Ве мусульман олгъандан сонъ кяфир олдылар.»

         Мусульман алимлери сёз иле япылгъан имансызлыкъ бар олгъанына Мукъаддес Къурʼандан бу Аетни исбат оларакъ кетирелер. Сёз иле япылгъан имансызлыкъ тиль иле япыла ве о энъ чокъ даркъалгъан динсизликтир. Аллаhны, Мелеклерни, Пейгъамберлерни, Къурʼанны, намазны, оразаны эм де Шариʻатны сёгмек ве ашаламакъ – сёзнен япылгъан имансызлыкътыр.

         Бойле киби сёзлерни айткъан насыл алда олса олсун (джиддий алда, шакъа я да ачувланып), динден чыкъа. Ве бойле аллар оны акъламаз. Биз Аллаhны юджельтемиз ве Онъа хамд этемиз, Онъа ибадет япамыз ве къусурларны къошмаймыз.

Мукъаддес Къурʼанда («Аль-Худжурат» Суреси, 15 Аетте) буюрыла:

إِنَّمَا الْمُؤْمِنُونَ الَّذِينَ آمَنُوا بِاللَّهِ وَرَسُولِهِ ثُمَّ لَمْ يَرْتَابُوا

Манасы: «Керчектен, Аллаhкъа, Ресуллерине иман эткен ве сонъра шубеленмегенлер – мусульманлар».

         Мусульман алимлери итикъат иле япылгъан имансызлыкъ бар олгъанына Мукъаддес Къурʼандан бу Аетни исбат оларакъ кетирелер. Итикъатнынъ ери юректир, онынъ ичюн бу имансызлыкъ юрекнен япыла. Ве иманда шубеленюв – бу имансызлыкътыр. Бир юректе бир вакъытта эм иман эм де шубеленюв оламаз.

         Итикъатта имансызлыкъ – бу Аллаh нур я да балабан я да кучюк беден деп тюшюнмек. Я да Аллаhнынъ ери бар олгъанына я да О кокте олгъанына я да О эр ерде бар олгъанына инанмакъ – имансызлыкътыр. Чюнки Аллаh ич бир шейге бенъземей ве Онъа ошагъан ич бир шей ёкъ. Аллаh кунешке, айгъа, сейярелерге, адамларгъа, джиннлерге ошамай. Юдже Аллаh Мукъаддес Къурʼанда («Аш-Шура» Суреси, 11 Аетте) буюра:

كَمِثْلِهِ شَيْءٌ ۖ وَهُوَ السَّمِيعُ الْبَصِيرُ لَيْسَ

Манасы: «Онъа ошагъан ич бир шей ёкъ, О, эр шейни коре ве эшите».

         Эм де Мукъаддес Къурʼанда («Аль-Ихляс» Суреси, 4 Аетте) буюра:

وَلَمْ يَكُن لَّهُ كُفُوًا أَحَدٌ

Манасы: «Онъа тенъ ёкъ (Аллаhкъа)».

         Биз Аллаhны, Онынъ эмирлерини, Шариʻатны севемиз, тек Аллаhкъа инанамыз ве ибадет этемиз. Юдже Аллаh Мукъаддес Къурʼанда («Фуссылят» Суреси, 37 Аетте) буюра:

وَمِنْ آيَاتِهِ اللَّيْلُ وَالنَّهَارُ وَالشَّمْسُ وَالْقَمَرُ ۚ لَا تَسْجُدُوا لِلشَّمْسِ وَلَا لِلْقَمَرِ وَاسْجُدُوا لِلَّهِ الَّذِي خَلَقَهُنَّ إِن كُنتُمْ إِيَّاهُ تَعْبُدُونَ

Манасы: «Кунешке ве айгъа седжде япманъыз! Оларны яраткъан Екяне Аллаhкъа ибадет этинъиз».

         Яни не де кунешке, не де айгъа седжде япманъыз, олардан чокъ файда олса биле, чюнки олар яратылгъанлар. Ким Аллаhтан гъайры башкъасына ибадет этсе, демек, о, керчектен, Аллаhкъа ибадет этмей.

         Мусульман алимлери фииль имансызлыкъ бар олгъанына бу Аетни исбат оларакъ кетирелер. Яни кунешке, айгъа, атешке, шейтангъа седжде япмакъ эм де Къурʼанны билип, пис ерге атмакъ, онынъ устю аякънен басмакъ – бу фииль имансызлыкътыр.

         Онынъ ичюн сёз, итикъат ве фииль иле япылгъан имансызлыкъ мусульманны динден чыкъара. Ве бойле инсангъа имансызлыкъны токътатып, Келиме Шеhадетни айтып, Ислям динини къабул этмек керек.

Келиме Шеhадет: «Шеhадет этем, Аллаhтан башкъа иляh ёкъ, шеhадет этем, Мухаммад – Аллаhнынъ Пейгъамберидир.»

         Иманымызны ольмегендже къорчаламакъ – бу энъ муим шейдир. Иманымызны догъру илим иле къуветлештирмек, бизни чешит тюрлю имансызлыкътан ве ширктен Аллаh къорчаласын, эм де бу дюньяны иман иле терк этмеге Аллаh бизге насип этсин деп, Ду’а` этемиз.