Не ичюн Пейгъамбер Мухьаммад ‘алейhиссалямны пек севемиз

Категория: Джума хутбеси Просмотров: 3715

إِنَّ الْحَمْدَ للهِ نَحْمَدُهُ وَنَسْتَعِينُهُ وَنَسْتَغْفِرُهُ وَنَسْأَلُهُ مِنْ فَضْلِهِ الْعَظِيمِ،وَأَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيكَ لَهُ، وَأَشْهَدُ أَنَّ سَيِّدَنَا وَحَبِيبَنَا وَقُرَّةَ أَعْيُنِنَا مُحَمَّدًا عَبْدُ اللهِ وَرَسُولُهُ صَلَّى اللهُ وَسَلَّمَ عَلَيْهِ وَعَلَى كُلِّ رَسُولٍ أَرْسَلَهُ.أَمَّا بَعْدُ... عِبَادَ اللهِ، فَإِنِّي أُحِبُّكُمْ في اللهِ وَأُوصِيكُمْ وَنَفْسِي بِتَقْوَى اللهِ الْعَلِيِّ العظيم

Башлангъычсыз, сонъсуз ве Екяне Яратыджыгъа хамд олсун. Аллаh бизге иман, акъикъий дин багъышлады ве керчекни янълыштан айырмакъ ичюн акъыл берди. Аллаh бизге Озь Рахметинен Къурейшитлерден Пейгъамбер Мухаммад, `алейhиссалямны ёллады! О ‘Аднан къабиледен олып, сонъки Пейгъамбердир. Ве бутюн алемге Рахмет оларакъ берильди. Пейгъамбер Мухаммад, `алейhиссалям яхшылыкъкъа ве хидаетке давет этти. Мухаммад, `алейhиссалям Бир Аллаhкъа инанмакъ ве Аллаhнынъ Шари‘атыны кутьмеге огретти. О Аллаhкъа ортакъ къошмамагъа, путларгъа ве башкъа яратылгъанларгъа ибадет этмемеге давет этти.

Юдже Аллаh Пейгъамбер Мухаммад, `алейhиссалямгъа энъ буюк муджизе багъышлады, бу сонъки Семавий Китап – Къур`андыр. Ве бу Пейгъамберимизнинъ устюнлигини косьтере.

Аллаh эренлерге эбедий Дженнетте оладжакъларыны ваде этти. Эм де кяфирлер джеhэннемде шиддетли ве сонъсуз азап чекеджеклерини тенбиледи.

Шеhадет этем, Аллаhтан башкъа Иляh ёкъ ве шеhадет этем, Мухаммад Аллаhнынъ Ресули. О эписи адамларгъа ве джиннлерге йиберильди. Бизим Пейгъамберимизге ве башкъа эписи Пейгъамберлерге саллят ве селям олсун. Эм де Пейгъамбер Мухаммад, `алейhиссалямнынъ сахабелерине де селям олсун.

Къур`анда («Аль-Ахзаб» Суреси, 45-47 Аетлери) дениле, манасы: «Эй Пейгъамбер! Биз сени, акъикъатен бир шаат, бир муждеджи ве бир тенбиеджи оларакъ ёлладыкъ. Аллаhнынъ изининен, бир даветчи, иман ве илим нуруны сачмакъ ичюн ёлладыкъ. Аллаhтан буюк бир лютфке иришеджеклерини муминлерге мужделе.»

Мусульманларнынъ юреклери Пейгъамберимизге ынтыла. О мусульманлар ичюн къуванчтыр! Рухларнынъ ве къальплернинъ тедавийлемеси – бу Пейгъамбер Мухаммад, ‘алейhиссалямдыр! Онынъ сёзлери – бу нур. Онен багълы олгъан, ондан кельген эр шей ве О  къабул эткен шейлер нурдыр. Онынъ ишлери де нур. Пейгъамбер Мухаммад, ‘алейhиссалям индемегенде, онда улулыкъ, джиддийлик ве агъыр-сабырлыкъ даа чокъ корюне эди. Пейгъамберимиз лаф эткенде, о озюне дикъкъат чеке эди. Онынъ сёзлерини динълей эдилер, онынъ сёзлери юреклерге синъип, сабыр, урьмет ве итаат догъура эдилер. Яни бизим Пейгъамбер Мухаммад, ‘алейhиссалямдан акъыллы ве аджайип ич кимсе ёкъ. 

О фукъарелернен, къулларнен, хызметчилернен, ёкъсулларнен чокъ вакъыт бераберликте кечирмеге чекинмеген. Бизим Пейгъамберимиз оларны сыкъ-сыкъ зиярет эте эди. Хасталарны зиярет этип, оларнынъ сагълыкълары акъкъында сорагъан. Эгер вефат этселер, дженазелерине бара эди.

Айтынъыз: насыл этип, бизим Пейгъамберимизни севмемели?! Онынъ лафлары анълайышлы, ачыкъ, келишкен (доступный) эди. О догърулыкъны янълыш фикирлерден ве яланны керчектен насыл айырмагъа тавсилятлыджа анълата эди. О Къур`анда олгъанларнен разы ола эди. Онынъ ахлякъы ве озюни алып барувы Къур`анда анълатылгъаны киби эди. О Къур`андаки талапларны эписини япа эди. Эгер бириси оны ынджытса, о ачувланмай эди. Амма эгер Аллаhнынъ эмирлерини бозсалар, япмасалар, о Аллаh ризасы ичюн бунъа къаршы чыкъып, тенбилей эди. Пейгъамберимиз эм ачувлангъанда, эм де къувангъанда гузель эди. О Аллаhнынъ эмирлерини ихляснен ве башкъалардан энъ яхшы япты. 

Насыл Пейгъамберимизни севмемели?! О адамлар арасында энъ утанчакъ, алчакъ гонъюлли эди. Аллаh Пейгъамберимизге энъ гузель ахлякъ багъышлады. Ачувлы я да хошнут олса биле, о ич бир вакъыт ялан айтмады, тек керчекни айта эди. О эписи ярамайлыкътан къорчалангъан. Шакъа олса биле, ялан айтмай эди. О джиддийликнен ве гъайрет иле вааз эте эди. Пейгъамберимиз адамларгъа Аллаhнынъ буюк аляметлерини хатырлата эди ве ким Аллаhнынъ эмирлерини япмаса, азап оладжагъыны тенбилей эди.

Пейгъамберимиз хутбени анълаткъанда, о гъайрет эткени ичюн козьлери къызара эди. О пек джиддий ве юксек сеснен айта эди. Бизим Пейгъамберимиз къувангъанда онынъ бети эйилиги ве самимиети ичюн толгъун ай киби нурлана эди.

Насыл этип, Пейгъамберимизни юректен севмейджексинъ?! О айры бир шефаат саибидир. Онынъ шефааты тек Пейгъамбер вакъытында яшагъан мусульманлар ичюн дегиль де, ондан эвель ве сонъ яшагъан ве башкъа Пейгъамберлернинъ артындан кеткен мусульманлар ичюн оладжакъ.

Онынъ шефааты шу куню оладжакъ ки, не заман инсанлар бири-бирине айтаджакълар: «Келинъиз, Пейгъамбер Адемге, о биз ичюн шефаат япаджакъ (яни Аллаhтан биз ичюн рахмет ве афу сорасын)». Олар Пейгъамбер Адемге кетеджеклер ве айтаджакълар: «Адем, Сен бутюн инсанларнынъ бабасы, Аллаh сени биринджи инсан оларакъ яратты, Санъа Мелеклер селям седждесини яптылар! Бизим ичюн шефаат бер («Аллаhтан бизге мерамет сора»)!» Пейгъамбер Адем оларгъа айтаджакъ: «Мен махсус шефааты олгъанлардан дегилим, Нухкъа барынъыз». Бу адамлар Пейгъамбер Нухкъа бараджакълар ве ондан шефаат сораджакълар. Пейгъамбер Нух оларгъа дейджек: «Ибраhимге барынъыз». Олар Пейгъамбер Ибраhимге кетеджеклер ве Пейгъамбер Ибраhим оларгъа айтаджакъ: «Мен махсус шефааты олгъанлардан дегилим, Мусагъа барынъыз». Олар Пейгъамбер Мусагъа бараджакълар ве Пейгъамбер Муса оларгъа айтаджакъ: «Мен махсус шефааты олгъандардан дегилим, ‘Исагъа барынъыз». Олар Пейгъамбер ‘Исагъа кельгенде о оларгъа айтаджакъ: «Мен махсус шефааты олгъанлардан дегилим, лякин сиз Мухаммадгъа кетинъиз». О вакъыт бу адамлар Пейгъамбер Мухаммад, ‘алейhиссалямгъа келеджеклер. Ресуль Аллаhкъа седжде япаджакъ. Ондан сонъ Пейгъамберимизге о ерден турсын, ве гуняхкяр мусульманлардан кимге истесе, шефаат япсын деп бильдириледжек эм де оларгъа рахмет ве афу оладжакъ. Бойле этип, Пейгъамбер Мухаммад, ‘алейhиссалямгъа онынъ истенильгени бериледжек.

Яратылгъанлардан энъ гузель Пейгъамбер Мухаммад, ‘алейhиссалямны насыл севмемели?! О бойле айткъан ки, ким Пейгъамберни тюшюнде корьсе, айыныкъ олгъанда да корер.

Белли такъвалы алим Аль-Хасан ибн Хайй саляфитлер вакъытында яшагъан, къарарнен 150 йыл Пейгъамбер Мухаммад, ‘алейhиссалямнынъ ольгенинден сонъ. О Хадислерни яхшы биле эди. Онынъ догъмуш агъасы бар эди, о да бильгили ве такъвалы эди. Аль-Хасан ибн Хайй олюм алында олгъанда, агъасы янында отура эди ве онынъ Къур`ан окъугъаныны эшитти («Ан-Ниса`» Суреси, 69 Аети), манасы: «Ким Аллаhкъа ве Ресулине итаат этсе, иште, оларгъа Аллаh айры бир Рахмет багъышлайджакъ, яни олар Пейгъамберлер, сыдыкълар, шеитлер ве салих кишилернен берабер оладжакълар. Булар не гузель бир аркъадашлар!»

Агъасы ондан сорады: «Къардашым, сен Къур`ан окъуйсынъмы?» Аль-Хасан ибн Хайй онъа деди: «Ёкъ. Мен Аллаhнынъ Ресулини (Пейгъамбер къабирде эди) корьдим, о манъа кулюмсиреди ве мен Дженнетке киреджегимни айтып къувандырды». Мен Мелеклерни ве хур аль-‘инни корем…»

Хадисте ишандырыла ки, ким Пейгъамберни тюшюнде корьсе, демек, оны айыныкъта да кореджек, яни даа ольмезден бу дюньяда кореджек. Пейгъамбер Мухаммад, ‘алейhиссалямны тюшюнде корьмек – бу хайырлы хабер ве бу инсан иманлы оледжегине бир аляметтир.

Аллаhым! Бизге бу ве эр гедже эм де ольмезден эвель Пейгъамбер Мухаммад, ‘алейhиссалямны тюшюнде корьмеге насип эт.