Центральное духовное управление мусульман - Таврический муфтият - Джемаат намазнынъ устюнлиги

Джемаат намазнынъ устюнлиги

إِنَّ الْحَمْدَ لِلَّهِ نَحْمَدُهُ وَنَسْتَغْفِرُهُ وَنَسْتَعِينُهُ وَنَسْتَهْدِيهِ وَنَعُوذُ بِاللَّهِ مِنْ شُرُورِ أَنْفُسِنَا وَمِنْ سَيِّئَاتِ أَعْمَالِنَا، مَنْ يَهْدِهِ اللَّهُ فَلاَ مُضِلَّ لَهُ وَمَنْ يُضْلِلْ فَلاَ هَادِيَ لَهُ، وَأَشْهَدُ أَنْ لاَ إِلَهَ إِلاَّ اللَّهُ وَحْدَهُ لاَ شَرِيكَ لَهُ، وَأَشْهَدُ أَنَّ سَيِّدِنَا مُحَمَّدًا عَبْدُهُ وَرَسُولُهُ صَلَوَاتُ اللَّهِ وَسَلاَمُهُ عَلَيْهِ وَعَلَى كُلِّ رَسُولٍ أَرْسَلَهُ.

أَمَّا بَعْدُ عِبَادَ اللَّهِ، أُوصِيكُمْ وَنَفْسِيَ بِتَقْوَى اللَّهِ الْعَلِيِّ الْعَظِيمِ.

Аллаhкъа хамд олсун, О бизге ярдым ве бизни афу этсин деп, Ду’а` япамыз. Бизни шерден ве яманлыкътан къорчаласын деп, Онъа ялварамыз. Кимге Аллаh Акъикъий елуны берди, ич кимсе оны бу ёлдан айырмаз. Амма кимге Аллаh Акъикъий ёлуны бермеди, ич кимсе оны къорчаламаз. Аллаh къусурсыз, ич бир шейге ве ич бир кимсеге мухтадж дегиль эм де Онъа бенъзеген екъ.

Шеhадет этем, Аллаhтан башкъа иляh екъ, Онынъ ортагъы екъ ве Мухаммад Аллаhнынъ къулу ве Пейгъамбери.

Аллаhнынъ къуллары! Такъвалы олмагъа эпинъизни давет этем. Такъвалыкъ – бу фарзларны япмакъ ве гуняхлардан къачынмакътыр.

Юдже Аллаh буюрды, манасы: «Аллаhнынъ аляметлерини итибар эткен мусульманлар – бу оларнынъ юреклеринде олгъан такъвалыкътандыр.»

﴿ذَٰلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ﴾

Сайгъылы дин къардашларым! Керчектен де, джемаатнен намазнынъ къылынувы – бу мусульманларнынъ энъ муим символларындан биридир. Бунъа Пейгъамберимиз чокъ дикъкъат айыра эди. Ве хаста алда биле о джемаат намазыны ич бир вакъыт къалдырмай эди.

Аише анамыз, Аллаh ондан разы олсун деди, манасы: «Пейгъамбер Мухаммад ‘алейhиссалям хасталанды ве бу хасталыкъ оны олюмге кетирди. Намаз вакъыты кельгенде эзандан сонъ Пейгъамбер Мухаммад ‘алейhиссалям деди, манасы: «Абу Бакргъа айтынъыз, джемаат намазыны алып барсын. Пейгъамбер Мухаммад ‘алейhиссалямгъа дедилер ки, Абу Бакрнынъ юреги йымшакъ, эгер о сенинъ ерине намазны алып барса, о кедерленир ве намазны алып барамаз эм де Къур`анны окъуп оламаз.»

Пейгъамбер Мухаммад ‘алейhиссалям озь эмирини текрарлады. Онъа айнысыны айттылар. Пейгъамбер Мухаммад ‘алейhиссалям кене деди: «Айтынъыз, Абу Бакргъа джемаат намазыны алып барсын», ондан сонъ бу сёзлерни Абу Бакргъа айттылар ве о имам олып, джемаат намазыны къылдырмагъа башлады.

Пейгъамбер Мухаммад ‘алейhиссалям алынынъ гузеллешмесини дуйып, эки адамнынъ ярдымынен джемааткъа чыкъты.»

Сайгъылы мусульманлар! Бу бизим севимли Пейгъамберимиз. О биз ичюн энъ гузель нумюнедир. О агъыр хасталыкъта биле алы бираз енгиллешкен сонъ эп бир джемаат намазына барды ве бу ибадетке дикъкъат айырды.

Аише, Аллаh ондан разы олсун, девам этти, манасы: «Мен корьдим ки, Пейгъамбер Мухаммад ‘алейhиссалямгъа аякълары агъыргъаны себебинден юрьмеге агъыр эди. Амма о эп бир намаз къылгъанларгъа якъынлашты. Пейгъамбер имам ерине турсын деп, Абу Бакр арткъа кетмеге истеди. Амма Пейгъамбер Мухаммад ‘алейhиссалям Абу Бакр еринде къалсын деп ишарет этти. Пейгъамбер озю Абу Бакр янына отурып, намаз къылмагъа башлады. Бойлеликнен, Абу Бакр Пейгъамбернинъ артындан намаз къылды, джемаат исе Абу Бакрнынъ артындан намаз къылды.»

Белли ки, джемаатнен япылгъан намазнынъ зияде устюнлиги бар. Бу акъкъында Пейгъамбер Мухаммад ‘алейhиссалям бойле деди, манасы: «Эркекнинъ джемаатнен къылынгъан намазы бир озю къылгъан намазындан 27 кере устюндир.»

"صَلَاةُ الرَّجُلِ في الْجَمَاعَةِ تَزِيدُ عَلَى صَلَاتِهِ وَحْدَهُ سَبْعًا وَعِشْرِينَ دَرَجَةً"

Абу hурайраh, Аллаh ондан разы олсун, Пейгъамбер Мухаммад ‘алейhиссалямнынъ бойле сёзлерини ривает этти, манасы: «Эркекнинъ джемаатнен къылынгъан намазы бир озю эвде я да ишлеген еринде къылгъан намазындан 20 кереден устюндир. Эгер о абдестни догъру энъ яхшы шекильде алып ве самимий ниетнен намаз къылмагъа джамиге кетти. Эм де джамиге баргъаны къадар эр адымда онынъ дереджеси юкселе ве гуняхлары афу олуна. Эгер о намазыны догъру къылса, намаз къылгъан ерини терк этмегендже Мелеклер онъа Дуʻа` окъуйлар. Олар бу адамгъа Аллаhтан рахмет багъышлангъаныны ве гуняхлары афу олунгъаныны истейлер.»

Джемаат намаз – бу фард кифайя. Фард кифайя – бу джемаат вазифеси, яни къул олмагъан етишкенлик чагъында ве ерли сакин олгъан эм де буны япмамагъа акъкъы олгъанларгъа къылмагъа керек. Яни эгер базы адамлар джемаат намазыны къылсалар, башкъа адамлар буны япмагъа борджлу дегиллер. Эгер эки ве ондан зияде инсан олса, джемаат намазыны къылмагъа мумкюн.

Юдже Аллаh Къур`анда буюра, манасы: «Намаз къылынъыз, Зекят беринъиз ве башкъа намаз къылгъанларнен берабер Руку‘ япынъыз.»

Бу Ает джемаат намазнынъ буюк эмиети олгъаныны бизге анълата.

﴿وَأَقِيمُواْ الصَّلَاةَ وَآتُواْ الزَّكَاةَ وَارْكَعُواْ مَعَ الرَّاكِعِينَ﴾

Ибн Маджаh, Ад-Даракутний, Ибн Хиббан ве Аль-Хаким Ибн ‘Аббастан бойле Пейгъамберимизнинъ Хадисини ривает эттилер, манасы: «Эгер бир инсан эзанны эшитсе ве онынъ бармамагъа диний себеби олмаса, о намазыны бир озю къылса, онъа савап екъ.» Яни бойле къылынгъан намаз макруh сайыла. Чюнки джемаатнен ве джамиде намазны къылмакъ даа яхшыдыр. Буны Пейгъамберимизнинъ сезлери тасдикълай, манасы: «Фарз намазлар джамиде япылса яхшыдыр, башкъа намазлар исе эвде.»

"مَنْ سَمِعَ النِّدَاءَ فَلَمْ يَأْتِهِ فَلَا صَلَاةَ لَهُ إِلَّا مِنْ عُذْرٍ"

"أَفْضَلُ صَلَاةِ الْمَرْءِ في بَيْتِهِ إِلَّا الْمَكْتُوبَةَ"

Урьметли мусульманлар! Джемаатнен ве джамиде намазны къылмакъ даа яхшыдыр. Имам Муслим Пейгъамбер Мухаммад ‘алейhиссалямнынъ бойле сёзлерини ривает этти, манасы: джемаат намазыны къылгъанда Къур`анны яхшы окъугъан инсан намазда имам ола. Эгер Къур`анны яхшы окъугъан адамлар бир къач олса, олардан Пейгъамберимизнинъ суннетини яхшы бильген имам ола. Эгер бойле инсанлар кене де бир къач олса, hиджретни эвель япкъан имам ола. Эгер кене де бойле инсанлар бир къач олса, ким Ислям динини эвельдже къабул этти, о имам ола. Башкъа риваетте кимнинъ яшы буюк олса, о имам ола.

Сайгъылы мусульманлар! Керчектен де, эгер мусульманлар куньде беш кере бир ерде топлансалар, мусульманларнынъ джемаатына чокъ файда олур. Бу мусульманларны бирлештире, янъы танышувлар ола ве бири-бирине ярдым этмеге себеп ола. Бойле олса, хасталар зиярет этилир, кучьлю зайыф олгъанны къорчалар, зенгинлер фукъарелерге ярдым этерлер.

Джемаат намазында чешит мусульманлар берабер омуз-омузгъа якъын олып, бир сырада туралар. Оларнынъ арасында яш къартнен, зенгин фукъаренен, сатыджы алыджынен ве дигерлери берабер туралар. Олар эписи берабер намаз къылып, Аллаhнынъ эмирини ерине кетирип, баш эгелер. Ве оларнынъ арасында такъвалыкътан гъайры ич бир фаркъ екътыр.

Эй, азиз дин къардашларым! Пейгъамбер Мухаммад ‘алейhиссалям бизге косьтерген елунен кетмеге ве Шари‘атны кутьмеге керекмиз. Керчектен де, энъ яхшы ребер ве насиат бу бизим Пейгъамбер Мухаммад ‘алейhиссалям анълаткъан шейлердир. Бу бизим кучюмиз! Бунен берабер биз бахытлы олурмыз.

Аллаh бизге такъвалы олмагъа насип этсин. Бизим иманымызны къуветлештирсин ве гуняхларымызны афу этсин деп, Дуʻа этемиз.

هَذَا وَأَسْتَغْفِرُ اللَّهَ لي وَلَكُمْ

Контакты

Центральное духовное управление мусульман -

Таврический муфтият, Муфтият Крыма,

ул. 1 Конной Армии, 66,

г. Симферополь, Республика Крым, Россия, 295024,

тел.: +7978-038-83-89,

e-mail: info@cdumk.ru