Тасаввуф

Категория: Пятничная проповедь Просмотров: 1964

 إِنَّ الْحَمْدَ لِلَّهِ نَحْمَدهُ وَنَسْتَغْفِرُهُ وَنَسْتَعِينُهُ وَنَسْتَهْدِيهِ وَنَعُوذُ بِاللهِ مِن شُرُورِ أَنفُسِنَا وَمِن سَيِّئَاتِ أَعْمَالِنَا، مَن يَهْدِ اللهُ فَلاَ مُضِلَّ لَهُ وَمَن يُضْلِلْ فَلاَ هَادِيَ لَهُ، وَأَشْهَدُ أَن لاَ إِلهَ إِلاَّ اللهُ وَحْدَهُ لاَ شَرِيكَ لَهُ ولا مَثِيلَ له ولا ضِدَّ له ولا نِدَّ له، وَأَشْهَدُ أَنَّ سَيِّدَنَا وحَبِيبَنا وعظيمَنا وقائدَنا وقُرَّةَ أَعْيُنِنا مُحَمَّدًا عَبْدُهُ وَرَسُولُهُ وصَفِيُّهُ وحبيبُهُ صَلَوَاتُ اللهِ وَسَلاَمُهُ عَلَيْهِ وَعَلَى كُلِّ رَسُولٍ أَرْسَلَه. الصلاةُ والسلامُ عليكَ سيِّدي يا رسولَ الله. الصلاةُ والسلامُ عليكَ يا سيِّدي يا صاحِبَ الذِّكرَى يا أبا القاسِم يا أبا الزَّهْراءِ يا محمد. أَمَّا بَعدُ عِبَادَ اللهِ، فإني أُوصِيكُمْ وَنَفْسِيَ بِتَقْوَى اللهِ الْعَلِيِّ الْقَديرِ القائلِ في مُحْكَمِ كتابِه:

﴿ يَاأَيُّهَا الَّذِينَ آمَنُوا اتَّقُوا اللَّهَ وَلْتَنْظُرْ نَفْسٌ مَا قَدَّمَتْ لِغَدٍ وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ﴾

         Юдже Аллаhкъа хамд олсун! Онъа тенъ (равного) ве ошагъан ич бир шей ёкъ. Аллаh кяинатны ич бирининъ ярдымы олмадан яратты. Эбедий Яратыджыгъа хамд олсун, О къусурсыз, сынъырсыз, акъылнен тасавур этильмеген, тараф ве мекян яратылмаздан эвель бар эди. Аллаhкъа ич бир шей ошамай, О эр шейни эшите ве коре.

Ресуллерден ве Пейгъамберлерден энъ улу олгъан Мухаммад ‘алейhиссалям ‘Абдуллаhнынъ огълуна салят ве селям олсун. Ве эписи онынъ несилине ве сахабелерине де селямлар олсун.

Екяне Яратыджыгъа такъвалы ве итаатлы олмагъа эр кесни давет этемиз. Эр вакъыт Шари‘атны кутьмек ве Ахирет кунюне азырланмакъ керек. Шу куню акъ итикъады олмагъан инсанларгъа мал, пара ве балалары ярдым этип оламазлар. Эр биримиз озюни ве сойларымызны джеhэннем атешинден къорчаламакъ ичюн, Аллаh эмир эткенлерини бильмек керекмиз.

         Юдже Аллаh Къур`анда бойле деди: «Юдже Аллаh мусульманларгъа такъвалы олмагъа ве тек Шариʻаткъа уйгъун олгъан шейлерни айтмагъа буюрды. Аллаh бойле мусульманларгъа Дженнетте эбедий оладжакъларыны ваде этти.»

         Сайгъылы мусульманлар! Шариʻаткъа уйгъун олгъан шейлерни биз къабул этемиз, амма Шариʻаткъа къаршы олгъан шейлерни ред этемиз. Ким Дженнетте эбедий эйиликке булунмагъа истесе, Шариʻатны кутип, умметнинъ чокъусынен берабер олмакъ керек.

         Ислям алимлернинъ юреклери экиюзьликтен ве яманлыкътан темиз эди эм де олар суфизм ве акъикъат ёлунен кетип, оларнынъ эсасларыны сакъладылар.

Юдже Аллаh Къур`анда бойле айтты, манасы:

﴿إِنَّمَا يَخْشَى اللَّهَ مِنْ عِبَادِهِ الْعُلَمَاءُ

«Керчектен де, Аллаhнынъ къулларындан динини бильген инсанлар энъ такъвалыдырлар.»

Суфизм акъкъында янълыш малюматлар даркъалгъаны себебинден биз онынъ догъру ве акъикъий манасыны анълатмагъа меджбурмыз. Чюнки базы инсанлар суфийлерни сёгип ве имансызлыкъта къабаатлай эдилер. Ондан гъайры базы инсанлар суфийлерни акъаретлеген китапларны яздылар.

Башкъа тюрлю инсанлар да бар, олар озь акъкъында суфий айтып, инсанларны алдатып, джаилликни даркъата эдилер. Бойле инсанлар динимизге къаршы олгъан шейлерини уйдыра эдилер. Эвель айтылгъан адамлар джаиль ве акъикъаттан узакълар.

Урьметли дин къардашларым! Акъикъий суфизм бу Шариʻатны тамамен кутьмектир. Биринджиден, бу Ислям эсасларындан акъикъий итикъаттыр. Яни Аллаhкъа инанув, Онынъ Ресуллерине ве Пейгъамберлерине инанув, Мелеклерге, Семавий Китапларгъа, Ахирет кунюне, къадерге эм де эр шейни Аллаh яраткъанына инанувдыр. Эм де бунъа имансызлыкънынъ эр бир чешитлеринден къорчаланув да кире. Ве Аллаh эмир эткен ибадетлерни кутьмек ичюн зарурий бильгилер олмалы.

Суфизм – бу Аллаhнынъ эмирлерини ихляснен, самимиетнен этмек ве Аллаh ясакъ эткен шейлерни япмамакътыр. Бунен берабер эписи бу шейлерни Аллаh ризасы ичюн самимий ниетнен япмалы ве айтылгъан сёзлер де догъру олмалы.

Акъикъий суфийлер суннетни кутелер, фукъарелерге, етимлерге, мухтаджларгъа, тул апайларгъа мераметли давраналар ве чарелери олса, ярдым этелер. Суфийлер бу дюньягъа чокъ дикъкъат айырмайлар ве кечиджи зевкъларгъа багълы дегиллер. Олар ичюн алтын ве къум айныдыр.

Акъикъий суфизм – бу Шариʻаткъа коре тербиелилик, алчакъ гонъюллилик ве эр шейде Пейгъамберимизден нумюне алув даветидир.

Къурʼанда буюрыла, манасы:

﴿قُلْ إِنْ كُنْتُمْ تُحِبُّونَ اللَّهَ فَاتَّبِعُونِي يُحْبِبْكُمُ اللَّهُ﴾

«Ким Юдже Аллаhны севе, Онынъ Ресули артындан кетсин.»

Ким бу ёлдан кете, о акъикъий суфий, онынъ шерефи юксек дереджеде ве бойле адамлар эвлиянынъ артындан кетип, оларнынъ дереджесине ете билелер, бойле кишилерни Аллаh севе.

Биринджи суфий Пейгъамбер Мухаммад ʻалейhиссалямнынъ досту Абу Бакр Ас-Сыддыкъ эди, Аллаh ондан разы олсун. Сонъ бу ёлдан кеткен сахабелердир. Олардан сонъра сахабелернинъ ёлундан кеткен табиʻинлердир. Ве табиʻинлернинъ арасында энъ яхшысы такъвалы суфий Увейс аль-Къараний эди. О акъкъында Пейгъамбер Мухаммад ʻалейhиссалям бойле деди, манасы:

”خَيْرُ التَّابِعِينَ رَجُلٌ يُقَالُ لَهُ أُوَيْسُ بْنُ عَامِرٍ مِنْ قَرَن ثُمَّ مِنْ مُرَاد، لَهُ وَالِدَةٌ هُوَ بِهَا بَرٌّ، كَانَ بِهِ بَرَصٌ فَأَذْهَبَهُ اللهُ عَنْهُ إِلا قَدْرَ دِرْهَمٍ، فَإِذَا لَقِيتُمُوهُ فَمُرُوهُ فَلْيَسْتَغْفِرْ لَكُمْ“

«Табиʻинлерден энъ яхшысы – Увейс ʻАмир аль-Къаранийнинъ огълудыр. О Мураднынъ несилиндендир. Бу адамнынъ анасы бар эди. Бу апай огълунынъ ярдымына мухтадж эди. Огълу исе анасына мераметли ве йымшакъ даврана эди. Увейс аль-Къараний Аллаh агъыр хасталыкътан (проказа) тедавийледи. Ве бу хасталыкътан сонъ онынъ беденинде пек уфакъ, кумюш капик дайын из къалды. Эгер сиз оны корьсенъиз, о Аллаhтан сизге афу сорасын деп истенъиз.»

Бу адамнынъ Дуʻасы алельхусус, Аллаh бу эвлиянынъ Дуʻасыны къабул эте эди. ʻУмар ибн аль-Хаттаб экинджи Халиф олгъан сонъ, Увайс аль-Каранийнен корюшкенде ондан озюне истигъфар Дуʻасынынъ окъулмасыны истеди, амма ʻУмар ибн аль-Хаттаб Увайс аль-Каранийден даа буюк эвлия эди. Халиф Пейгъамберимизнинъ Хадисине уйып, бойле япты. Ве бу амель керчек суфийнинъ нумюнесидир.

Увейс аль-Къараний фукъаре адам, онынъ урбасы эски эди. ʻУмар ибн аль-Хаттаб онъа эр ай паранен ярдым теклиф эткенде, о такъвалы олгъаны ичюн бунъа разы олмады.

Сайгъылы дин къардашларым! Акъикъий суфизм тазирленген шейлерден дегиль. Асылында, Шариʻатны кутьмеген. Пейгъамберимизнинъ ёлундан кетмеген, озюни суфий адландыргъан инсанларны тазирлемек керек. Керчектен де, акъикъий суфий Пейгъамберимизнинъ Шариʻатыны тамамен куте.

Шимдики заманда озюни суфий сайгъан, амма мушкюль, янълыш фикирде булунгъан акъынты бар. Олар озь китапларында язалар ки, ким Къур`аннынъ айры бир Аетлерини окъуса, санки Пейгъамбер ве эвлияларнынъ дереджесинден юксек ола. Онынъ ичюн биз бу инсанлар янълыш фикирде олгъанларыны башкъа инсанларны тенбилемеге меджбурмыз. Оларнынъ айткъанлары Къур`ангъа уймай, чюнки Мубарек Къур`ангъа Пейгъамберлер акъкъында бойле айтыла, манасы:

﴿وَكُلًّا فَضَّلْنَا عَلَى الْعَالَمِينَ﴾

 «Пейгъамберлерден эр бириси алемлерден даа яхшыдыр.»

Къур`ангъа къаршы олгъан эр бир сёз бу имансызлыкъ ве янълыштыр. Атта бу сёзлер бинъ китапларда язылса биле.

Аллаhнынъ къуллары! Пейгъамбер Мухаммад ʻалейhиссалям диний бильгилерни огренмеге давет эте эди. Акъикъий бильгилерге эсасланып, динимизни кутьмек, япкъан ибадетлерден Ахиретте бизге файда кетирген эм де азаптан къорчалагъан шейлерни япмакъ. Бильмек керек ки, диний бильгилерге ынтылув, бу Ахиретте къорчалагъан бир себептир.

         Аллаh бизге акъикъий эвлияларнынъ дереджесине етмеге кучь-къувет багъышласын ве япкъан ибадетлеримизни къабул этип, азапсыз Дженнетке кирмеге насип этсин.